کچھ کرکٹرز پیسوں کی خاطر پان مصالحہ کا اشتہار بھی کرتے ہیں، گوتم گمبھیر
١٢ جون ٢٠٢٣
بھارت کے سابق اسٹارکرکٹر گوتم گمبھیر نے اپنے ہی بورڈ کو آڑے ہاتھوں لے لیا۔
بھارتی کرکٹ ٹیم کے سابق کھلاڑی گوتم گمبھیر نے چند مخصوص کھلاڑیوں کو اسٹار بنانے پر بورڈ کو کڑی تنقید کا نشانہ بنا ڈالا۔
گوتم گمبیھر نے ٹیسٹ چمپئین شپ میں بھارت کی آسٹریلیا کے ہاتھوں شکست کو شرمناک قرار دیتے ہوئے کہا کہ کرکٹ ٹیم میں چند مخصوص کھلاڑیوں کی بے تحاشا تشہیر کی جاتی ہے۔ کھلاڑی پیسوں کے لیے پان مصالحے کا اشتہار تک کرلیتے ہیں اور اپنی حیثیت کا احساس نہیں کرتے۔
سابق بھارتی کرکٹر کا مزید کہنا تھا کہ بھارتی کرکٹ بورڈ کے تمام اسٹیک ہولڈرز جس میں میڈیا بھی شامل ہے، چند کرکٹرز کو ہی پروموٹ کرتے رہتے ہیں اور اسی وجہ سے وہ اسٹار بن جاتے ہیں۔
انہوں نے مزید کہا کہ بھارت میں کچھ کھلاڑی ٹیم سے بھی بڑے ہوگئے ہیں۔ دیگرملکوں میں قومی ٹیموں کو اہمیت دی جاتی ہے لیکن بھارت میں لوگ ٹیم کے بجائے چند کھلاڑیوں کے دیوانے ہوتے ہیں۔ گوتم گمبھیر نے کہا کہ براڈ کاسٹرز اور میڈیا چند کھلاڑیوں کی پی آر کمپنی بن کر رہ گیا ہے۔ تین کھلاڑیوں کو بار بار دکھائیں گے تو وہی اسٹار بنیں گے۔
.jpg)
