چیئر مین پی سی بی اور وہاب ریاض میں فاصلے بڑھنے لگے

چیئرمین پی سی بی محسن نقوی اور چیف سلیکٹر وہاب ریاض کے درمیان فاصلے بڑھنے لگے، ذرائع کے مطابق قومی ٹیم کے سینئر منیجر و سلیکٹر کی جگہ ان دنوں سلیکٹر بلال افضل محسن نقوی کے زیادہ قریب ہوگئے ہیں۔ 
کرکٹ امور پر اب  سابق پیسر کے بجائے زیادہ تر مشاورت بورڈ کے سربراہ، بلال افضل سے کررہے ہیں۔ چند ہفتوں سے وہاب ریاض کو کسی بھی مشاورتی عمل کا حصہ نہیں بنایا گیا، بلال افضل ہی پیش پیش نظر آتے ہیں۔ 
ٹی ٹوئنٹی ورلڈکپ 2024 کے بعد سے وہاب کی محسن نقوی سے ملاقات بھی نہیں ہوسکی ہے جبکہ اگلے 2 ہفتے تک بھی اس کا کوئی امکان نہیں ہے، ذرائع کے مطابق وہاب ریاض گذشتہ ہفتے لاہور میں تھے لیکن بورڈ سربراہ کی مصروفیات کے سبب ان سے رابطہ نہیں ہوسکا، اب محسن نقوی پاکستان آ گئے ہیں تو وہاب ریاض انگلینڈ میں ہیں، ان کی واپسی 20جولائی تک ہوگی۔ 
ایک اور سلیکٹر عبدالرزاق بھی وہاب ریاض کے ساتھ ان دنوں برمنگھم میں لیجنڈز کرکٹ لیگ کے لیے موجود ہیں۔ وہاب ورلڈکپ 2024 میں قومی ٹیم کی ناقص کارکردگی کے حوالے سے اپنی رپورٹ پی سی بی کے پاس جمع کرواچکے ہیں۔ 
پی سی بی کے بورڈ آف گورنرز کا اجلاس ہفتے کو لاہور میں ہونے جارہا ہے جس  میں کرکٹ ٹیم اور دیگر اہم امورپر تبادلہ خیال کیا جائے گا اور کچھ اہم فیصلے ہوں گے۔
اس بات کے بھی امکانات ہیں کہ ٹیم مینجمنٹ میں بھی نئے چہرے سامنے لائے جائیں گے۔ پہلے مرحلے میں ٹیم کو بنگلہ دیش کے خلاف ٹیسٹ سیریز کا چیلنج درپیش ہے جو کہ اگست اور ستمبر میں شیڈول ہے۔