دونوں ٹیمیں حیدرآباد کے راجیو گاندھی کرکٹ اسٹیڈیم میں مدمقابل ہیں۔
٠٣ اکتوبر ٢٠٢٣
ورلڈ کپ 2023 کے وارم اپ میچ میں آسٹریلیا نے پاکستان کوجیت کے لئے 352 رنز کا ہدف دے دیا۔
حیدرآباد کن کے راجیو گاندھی کرکٹ اسٹیڈیم میں کھیلے جانے والے اس میچ میں آسٹریلیا نے مقررہ 50 اوورز میں 7 وکٹوں کے نقصان پر 351 رنز اسکور کیے، اوپنر ڈیوڈ وارنر اور مچل مارش نے اپنی ٹیم کو 83 رنز کا آغاز فراہم کیا، تاہم وارنر 48 رنز بناکر وکٹ گنوا بیٹھے جبکہ مارش 31 رنز بناکر آؤٹ ہوئے۔ دیگر کھلاڑیوں میں اسٹیو اسمتھ 27، ایلکس کیری 11 جبکہ مارنس لیبوشین 40 رنز بناکر نمایاں رہے۔
گلین میکسویل نے جارحانہ بیٹنگ کا مظاہرہ کرتے ہوئے 71 گیندوں پر 6 چھکوں اور 4 چوکوں کی مدد سے 77 رنز بنائے جبکہ جوش انگلس نے 30 گیندوں پر 48 رنز کی زبردست اننگز کھیلی۔
پاکستان کی جانب سے اسامہ میر نے 2 جبکہ محمد وسیم جونئیر، شاداب خان، محمد نواز اور حارث رؤف نے ایک ایک وکٹ حاصل کی۔
قبل ازیں آسٹریلیا کے کپتان پیٹ کمنز نے ٹاس جیت کر بیٹنگ کرنے کا فیصلہ کیا، انہوں نے کہا کہ کوشش کریں گے کہ بڑا مجموعہ ترتیب دے سکیں تاکہ اسکواڈ میں شامل تمام کھلاڑیوں کو کھیلنے کا موقع فراہم کریں۔
اس موقع پر گرین شرٹس کے کپتان شاداب خان نے کہا کہ کوشش ہوگی آسٹریلیا کے خلاف میچ میں شاندار کم بیک کریں اور تمام شعبوں میں بہترین کارکردگی پیش کریں۔
دوسری جانب کینگروز کے خلاف میچ میں شاداب خان کو کپتانی کے فرائض سونپے گئے ہیں جبکہ کپتان بابراعظم بیٹنگ کیلئے آئیں گے تاہم فیلڈنگ کیلئے دستیاب نہیں ہوں گے۔ اسی میچ میں وکٹ کیپر محمد رضوان کی جگہ محمد حارث کو موقع دیا گیا ہے۔
آسٹریلیا کا اسکواڈ:
کپتان پیٹ کمنز، ڈیوڈ وارنر، مچل مارش، اسٹیو اسمتھ، مارنس لیبوشین، الیکس کیری، گلین میکسویل، کیمرون گرین، جوش انگلس، مچل اسٹارک، شان ایبٹ، جوش ہیزل ووڈ، ایڈم زمپا، مارکس اسٹوئنس، ٹریوس ہیڈ شامل ہیں۔
پاکستان کا اسکواڈ:
کپتان، شاداب خان، عبداللہ شفیق، بابراعظم، امام الحق، فخر زمان، محمد رضوان، سعود شکیل، سلمان علی آغا، محمد وسیم، جونیئر، حسن علی، شاہین شاہ آفریدی، افتخار احمد اور محمد نواز شامل ہیں۔
