دولت کے لالچ میں ’’دی ہنڈریڈ ٹورنامنٹ‘‘ کا مستقبل داؤ پر لگ گیا

انگلینڈ کرکٹ بورڈ نے انگلش پریمیئر لیگ کی منصوبہ بندی شروع کردی، مینز ’’دی ہنڈریڈ‘‘ کے ساتھ ویمن ایونٹ کا فارمیٹ بھی تبدیل کیا جائے گا، 100 بالز فی سائیڈ پر مشتمل ٹورنامنٹ کا آغاز کئی برس کی منصوبہ بندی کے بعد کیا گیا تھا۔

کورونا وائرس کی وجہ سے ایک برس کی مزید تاخیر بھی ہوئی مگر انگلش کرکٹ بورڈ کو اپنے منفرد فارمیٹ کے حامل ایونٹ سے ویسی کامیابی حاصل نہیں ہوسکی جس کی توقع تھی، اس لیے اسے بھی دنیا کے دوسرے ممالک میں کھیلی جانے والی لیگز کی طرح ٹی 20 فارمیٹ پر منتقل کرنے پر غور شروع کردیا گیا، ٹیموں کی تعداد بھی 8 سے 18 کرنے کا جائزہ لیا جارہا ہے۔

اس میں بھی کاؤنٹی چیمپئن شپ کی طرح ٹاپ اور سیکنڈ ڈویژن متعارف کرانے اور ٹیموں کی کارکردگی پر ترقی و تنزلی پر بھی غور ہونے لگا، اسی طرح ٹیمیں کاؤنٹیز کے بجائے شہروں کے نام پر ہوں گی، ہر کاؤنٹی میں موجود وینیوز پر ٹیموں کا نام رکھا جائے گا، اس میں پرائیویٹ سرمایہ کاری بھی لائی جائے گی، دی ہنڈریڈ کا موجودہ بنیادی کنٹریکٹ 2025 تک کے لیے ہے۔

ای سی بی کی جانب سے اچانک ذہن تبدیل کرنے کے پیچھے ایک مقامی فرم کی جانب سے ایونٹ میں 70 فیصد شیئرز کے عوض 400 ملین پاؤنڈ سرمایہ کاری کی پیشکش بھی کارفرما ہے۔

 دوسری جانب انگلش بورڈ کو خبردار کیا گیا ہے کہ اگر اس نے ٹورنامنٹ کا فارمیٹ تبدیل کیا تو موجودہ براڈکاسٹر کے ساتھ 220 ملین پاؤنڈ کی ڈیل متاثر ہوسکتی ہے،اس کی مدت 2028 تک ہے، حکام کی جانب سے موجودہ صورتحال کا جائزہ لیا جارہا ہے۔