امپائرکے فیصلے پر ناراضی، بھارتی کپتان پر75 فیصد میچ فیس جرمانہ

امپائر کے فیصلے پر ناراضی کا اظہار کرتے ہوئے وکٹ پر غصے میں بیٹ مارنے پر بھارتی کپتان پر75 فیصد میچ فیس جرمانہ کردیا گیا۔ 
بنگلہ دیش سے سیریز کے تیسرے ون ڈے میں کامیابی سے محرومی پر مشتعل بھارتی کپتان نے ناقص امپائرنگ پر غصے کا اظہار کرتے ہوئے اپنا بیٹ وکٹوں پر ماردیا تھا جبکہ میچ کے اختتام پر انھوں نے آن فیلڈ امپائرز کو ٹیم کے ٹرافی کے ہمراہ فوٹوسیشن میں شریک ہونے کا بھی کہا تھا، تیسرا میچ ٹائی ہوجانے پر ٹرافی دونوں ملکوں نے شیئر کی ہے۔
دوسری جانب بھارتی کپتان ہرمنپریت کور پر امپائر کے فیصلے پر ناراضی کا اظہار کیے جانے پر میچ فیس کا 75 فیصد جرمانہ بھی عائد کیا گیا ہے۔
میڈیا رپورٹس کے مطابق بنگلہ دیشی کپتان نگارسلطانہ نے بھارتی ہم منصب کے رویے سے متعلق سوال پر کہا کہ انھیں زیادہ بہتر رویے کا مظاہرہ کرنا چاہیے، کرکٹ ڈسپلن اور قدر کرنے کا ہی نام ہے، کھیل میں امپائرز کا فیصلہ ہی حتمی ہوتا ہے چاہے وہ ہمیں پسند ہی نہ آئے، انھوں نے ہماری پلیئرز سے متعلق ناراضی کا اظہار نہیں کیا ہے، لہذا اس معاملے پر ہمارا زیادہ کچھ کہنا مناسب نہیں ہوگا۔
اس سے قبل بنگلہ دیش ویمنز ٹیم کی کپتان نگار سلطانہ نے بھارتی کپتان ہرمن پریت کور کے رویے پر تنقید کے نشتر چلاتے ہوئے کہا تھا کہ انہیں آداب سیکھنے کی ضرورت ہے۔
میرپور میں کھیلے گئے میچ کے دوران ہدف کے تعاقب میں بلے بازی کرنے والی بھارتی کپتان ہرمن پریت کور کو امپائر کی جانب سے آؤٹ قرار دیا گیا تو انہوں نے وکٹ پر بیٹ دے مارا تھا، بعدازاں پریزینٹشن کے دوران امپائرز کے فیصلوں پر تنقید کرتے ہوئے کہا کہ آئندہ جب کبھی ہم یہاں آئیں گے تو خود کو اس طرح کی صورتحال کے لیے بھی تیار رکھیں گے، انہوں نے الزام لگایا کہ امپائرز کے ناقص فیصلوں کے باعث بنگلہ دیش کو میچ جتوانے کی کوشش کی گئی۔
میچ کے اختتام پر پریس کانفرنس میں ہرمن پریت کے ریمارکس کے بارے میں بنگلہ دیشی ویمنز ٹیم کی کپتان نے ہرمن پریت کور کو آڑے ہاتھوں لیتے ہوئے طنز کیا کہ انہیں آداب سیکھنے کی ضرورت ہے۔