اہم کھلاڑی زخمی، انگلش ٹیم کے مستقبل کے ٹیسٹ منصوبے درہم برہم

انگلینڈ کی ٹیم کو ان کے آنے والے موسم گرما کےٹیسٹ میچز سے قبل بڑا دھچکا لگ گیا کیونکہ فاسٹ باؤلر جوش ٹونگ کو پیکٹرل انجری سے صحت یاب ہونے میں مزید وقت لگے گا جس کی وجہ سے وہ غیر معینہ مدت کے لیے ٹیسٹ اسکواڈ سے باہر ہو گئے ہیں۔ 
گزشتہ سال اگست سے میدان میں نظر نہ آنے کے باوجود، ٹونگ کو ویسٹ انڈیز کے خلاف پہلے میچ کے بعد جیمز اینڈرسن کی ٹیسٹ کرکٹ سے ریٹائرمنٹ کے بعد پیدا ہونے والے خلا کو پُر کرنے کا سب سے بڑا دعویدار سمجھا جاتا تھا۔ 
پچھلے سال دو ٹیسٹ میچوں میں ان کی شاندار پرفارمنس کے بعد سے وہ صحت کے مسائل سے دوچار ہیں۔ اس دھچکے نے انہیں انگلینڈ کے کیریبین کے وائٹ بال کے دورے اور اس سال کے شروع میں ہندوستان میں آئی سی سی ورلڈ ٹیسٹ چیمپئن شپ سیریز سے محروم ہونے پر مجبور کیا ہے۔ 
اس تازہ ترین دھچکے کا مطلب ہے کہ جوش ٹونگ ویسٹ انڈیز کے خلاف انگلینڈ کی آنے والی تین میچوں کی سیریز سے محروم ہو جائیں گے اور سری لنکا کے خلاف بعد میں ہونے والی سیریز کے لیے بھی ان کی دستیابی شکوک و شبہات کا شکارہے۔ 
انگلینڈ کے کیمپ کے ایک بیان کے مطابق، ان کی ایکشن میں واپسی کے لیے کوئی واضح ٹائم لائن ابھی نہیں دی جاسکتی ہے۔ 
یاد رہے کہ جوش ٹونگ نے اپنے بین الاقوامی کیریئر کا آغاز ایک یادگار انداز میں کیا تھا، انہوں نے آئرلینڈ کے خلاف اپنے ڈیبیو پر پانچ وکٹیں حاصل کیں اور لارڈز میں آسٹریلیا کے خلاف دوسرے ایشز ٹیسٹ میں یہ کارنامہ دوبارہ انجام دیا۔ 
جولائی میں ویسٹ انڈیز کے خلاف پہلے ٹیسٹ کے بعد جیمزاینڈرسن کے ریٹائر ہونے کے بعد، جوش ٹونگ کو ان کے ممکنہ جانشین کے طور پر سب سے مضبوط امید وار سمجھا جا رہا تھا۔ تاہم، ان کی انجری کے دھچکے نے قومی ٹیم میں ان کی مستقبل کی شمولیت پر غیر یقینی صورتحال پیدا کر دی ہے۔