وارنر کا کیچ چھوڑنے والے عبداللہ شفیق نے مچل مارش کا کیچ بھی گرادیا  

میلبرن ٹیسٹ میچ کی پہلی اننگز میں ڈیوڈ وارنر کا کیچ ڈراپ کرنے والے عبداللہ شفیق نے دوسری اننگز میں مچل مارش کا بھی کیچ گرادیا۔ 
باکسنگ ڈے ٹیسٹ میچ کے تیسرے روز پاکستانی فاسٹ بولرز نے شاندار کم بیک کرتے ہوئے آسٹریلوی ٹاپ آرڈر کا محض 16 کے مجموعی اسکور پر صفایا کردیا تھا تاہم سلپ میں فیلڈنگ کرنے والے عبداللہ شفیق نے مچل مارش کا 20 کے انفرادی اسکور پر عامر جمال کی گیند پر کیچ چھوڑ دیا، جس کے بعد انہوں نے نصف سینچری جڑدی۔ 
ٹیسٹ میچ میں یہ پہلا موقع نہیں ہے کہ جب عبداللہ شفیق نے کیچ ڈراپ کیا ہو، اس سے قبل پہلی اننگز میں انہوں نے ڈیوڈ وارنر کا کیچ گرایا جس کے بعد انہوں نے پاکستانی بولرز کی خوب درگت بنائی تھی۔  
سماجی رابطے کی ویب سائٹ ٹوئٹر (ایکس) پر عبداللہ شفیق کی جانب سے کیچ چھوڑنے کی ویڈیو شیئر کی گئی جو کہ اب دیگر سوشل میڈیا پلیٹ فارمز پر بھی تیزی سے وائرل ہورہی ہے۔  
گزشتہ روز پریس کانفرنس کے دوران قومی ٹیم کے اوپنر سے سوال کیا گیا تھا کہ انہوں نے کیچ کیوں ڈراپ کیا؟
جس پر عبداللہ شفیق کا کہنا تھا کہ بدقسمتی سے ڈیوڈ وارنر کا اہم کیچ ڈراپ ہوا، اگر تھام لیتا تو آسٹریلیا کی اننگز جلدی سمٹ سکتی تھی، کوئی بھی فیلڈر کیچ نہیں چھوڑنا چاہتا، میری غلطی تھی جس کو تسلیم کرتا ہوں۔