فیصل اکرم کی تباہ کُن بولنگ، شاہینزنے پی این جی کو224رنزسے ہرادیا

دورہ آسٹریلیا کے پہلے ون ڈے میں پاکستان شاہینز نے زبردست کارکردگی کا مظاہرہ کرتے ہوئے پاپوا نیوگنی کو 224 رنز سے ہرادیا۔ پاکستان شاہینز بدھ کے روز آسٹریلیا کے دورے کا دوسرا اور آخری ون ڈے میچ ناردن ٹیریٹری اسٹرائیک کے خلاف کھیلیں گے۔
پاکستان شاہینز نے دورۂ آسٹریلیا میں اپنے پہلے ون ڈے میچ میں زبردست پرفارمنس پیش کی اور پاپوا نیوگنی کو 224 رنز سے شکست دے دی۔ 
پاکستان شاہینز کے بلے باز اذان اویس اور عرفات منہاس نے بہترین بلے بازی کرتے ہوئے نصف سنچریاں اسکور کیں جبکہ فیصل اکرم نے زبردست بولنگ کرتے ہوئے پانچ وکٹیں حاصل کیں۔
پاکستان شاہینز نے ٹاس جیت کر پہلے بیٹنگ کرتے ہوئے مقررہ 50 اوورز میں 8 وکٹوں پر 323 رنز بنائے، پاکستان شاہینز کے اوپنرز اذان اویس نے 72 رنز کی شاندار اننگز کھیلی جبکہ عرفات منہاس نے 56 رنز کی اننگز کھیلی۔ 
جواب میں پاپوا نیوگنی کی ٹیم 22 اوورز میں صرف 99 رنز بناکرآل آؤٹ ہوگئی۔ 
پاکستان شاہینز کی طرف سے فیصل اکرم نے سترہ رنز دے کر پانچ وکٹیں حاصل کیں جو کہ ان کی اب تک کی بہترین کارکردگی رہی، احمد خان نے تین اور عامر حسن نے دو کھلاڑیوں کو آؤٹ کیا۔ 
پاکستان شاہینز بدھ کو آسٹریلیا کے دورے کا دوسرا اور آخری ون ڈے میچ ناردن ٹیریٹری اسٹرائیک کے خلاف کھیلیں گے۔