ممبئی میں ٹیم انڈیا کی ٹی20 ورلڈکپ ٹرافی کے ساتھ پریڈ، پورا شہر امڈ آیا

بھارتی ٹیم کا وطن واپسی پر شاندار استقبال کیا گیا، پورا ممبئی اپنے اسٹارز کو دیکھنے کے لیے سڑکوں پر اُمڈ آیا۔ ٹریفک اور ہجوم کے باعث متعدد شائقین کو سانس لینے میں دشواری کا سامنا بھی کرنا پڑا۔ مشکلات کے باوجود شائقین نے بھارت کی ٹی20 ورلڈ کپ جیت کا جشن جوش و خروش، رقص اور خوشی سے منایا جبکہ کھلاڑیوں نے فخریہ انداز میں ٹرافی کی نمائش کی۔ 
تفصیلات کے مطابق آئی سی سی ٹی ٹوئنٹی ورلڈکپ 2024جیتنے والی بھارتی کرکٹ ٹیم کا وطن واپسی پر شاندار استقبال کیاگیا، کھلاڑیوں نے وزیر اعظم نریندر مودی سے بھی ملاقات کی اور پھر ممبئی میں وکٹری پریڈ کرتے ہوئے وانکھیڑے اسٹیڈیم پہنچے جہاں شائقین کی بڑی تعداد نے ان کا خیرمقدم کیا۔ 
ٹی 20 ورلڈ کپ 2024 جیتنے کے بعد بالآخر بھارتی کرکٹ ٹیم اپنے وطن پہنچ گئی، چار روز تک بارباڈوس میں پھنسے رہنے کے بعد ٹیم نئی دہلی پہنچی۔ پہلے ائیر پورٹ پر بورڈ حکام نے اسٹارز کا استقبال کیا اورکیک بھی کاٹا، فینز کی بہت بڑی تعداد اپنے ہیروز کااستقبال کرنے کے لیے نئی دہلی کے ایئرپورٹ پہنچی۔ اس موقع پر ڈھول کی تھاپ پر بھنگڑے بھی ڈالے گئے،بھارتی کپتان روہت شرما نے بھی بھنگڑا ڈالا۔ جس کے بعد ٹیم کچھ دیر ہوٹل میں رکنے کے بعد وزیر اعظم نریندر مودی کی رہائش گاہ پہنچی۔  
وزیر اعظم نے کپتان، کوچ اور پوری ٹیم کو ٹائٹل جیتنے پر مبارک باد دی اور اس موقع پر زبردست فوٹو سیشن بھی ہوا۔ بعد ازاں بھارتی ٹیم ممبئی پہنچی اور پھر میرین ڈرائیو پر بس کے ذریعے وکٹری پریڈ کرتے ہوئے وانکھیڑے اسٹیڈیم کی طرف روانہ ہوئی۔ ممبئی میں وکٹری پریڈ میں ایسا منظر لگا کہ جیسے پورا شہر امڈ آیاہے، شائقین نے اپنی ٹیم کا تاریخی استقبال کیا اور کھلاڑیوں کی ایک جھلک دیکھنے کے لیے سڑکوں پر نکل آئے۔ 
اس موقع پر کپتان روہت شرما اور اسٹار بیٹر ویرات کوہلی سمیت دیگرکھلاڑی اوپن بس میں موجود تھے اور انہوں نے شائقین کے سامنے ٹی ٹوئنٹی ورلڈ کپ کی ٹرافی اٹھائی اور بھرپور حمایت کے لیے فینز کا شکریہ ادا کیا۔ 
بھارتی ٹیم وکٹری پریڈ کے بعد وانکھیڑے اسٹیڈیم پہنچی جہاں شائقین کی بڑی تعداد نے ٹیم کا استقبال کیا اور جیت کا جشن منایا۔ 
بھارتی ٹیم کے کپتان روہت شرما نے اس موقع پر خطاب کرتے ہوئے کہا کہ یہ ورلڈکپ ٹرافی پوری قوم کی ہے۔ 
واضح رہے کہ بھارت نے آئی سی سی ٹی ٹوئنٹی ورلڈکپ 2024 کے فائنل میں جنوبی افریقہ کو شکست دے کر دوسری بار ٹائٹل اپنے نام کیا۔ بھارتی کرکٹ ٹیم نے اس سے قبل 2007 میں ٹی ٹوئنٹی ورلڈکپ جیتا تھا۔