آسٹریلیا کیخلاف سیریز میں وکٹوں کی سنچری مکمل کرنا ہدف ہے، محمد عباس

نیشنل ہائی پرفارمنس سینٹر لاہور میں ٹریننگ کے بعد میڈیا سے بات چیت کرتے ہوئے محمد عباس کا کہنا تھا کہ دس سال سے باہر کھیل رہے ہیں، سب نے اس دوران ہوم سیریز کو مس کیا، باہر کی وکٹوں پر کھیلنے کے باوجود پاکستانی ٹیم کی کارکردگی بہترین رہی ہے، اب آسٹریلین ٹیم پاکستان آرہی ہے تو اس سے ہمیں اپنی کنڈیشنز پر کھیلنے اور پرفارم کرنے کا موقع ملے گا۔

پچیس ٹیسٹ میچوں میں نوے بلے بازوں کا شکار کرنے والے دھیمےمزاج کے پیسر نے بتایا کہ میرا ٹارگٹ ہوگا کہ پاکستانی پچز پر اپنی وکٹوں کی سنچری مکمل کروں، اگر ایسا کرنے میں کامیاب ہوجاتا ہوں تو یہ میرےلیے ایک اعزاز ہوگا، ہر ملک کی ٹیسٹ ٹیم بہترین کمبی نیشن کے ساتھ میدان میں اترتی ہے، ہم بھی مہمان ٹیم کی آمد کے منتظر ہیں اور ہوم سیریز میں بہترین پرفارمنس دینے کے لیے تیار ہیں، سب لڑکے اس سیریز کے لیے بھرپورتیاری کررہےہیں۔

انہوں نے کہا کہ ابھی تک تو میڈیا بھی یہ ہی رپورٹ کررہا ہے کہ آسٹریلیا ایک مضبوط ٹیم پاکستان بھیج رہا ہے، کوئی بھی ٹیم جب پاکستان آتی ہے تو اسے ملکی کرکٹ کو بہت فائدہ ہوتا ہے، یقین ہے کہ آسٹریلیا کے بعد انگلینڈ اور نیوزی لینڈ کی ٹیمیں بھی پاکستان آکر ضرور کھیلیں گی۔