فاطمہ ثناء پاکستانی ویمن ٹیم کی نئی کپتان بن گئیں

گرین شرٹس کی باصلاحیت کرکٹڑ فاطمہ ثناء کو نیوزی لینڈ ویمن کرکٹ ٹیم کے خلاف دوسرے ون ڈے میں کپتان مقرر کیا گیا ہے جبکہ ندا ڈار انجرڈ ہونے کے باعث نیوزی لینڈ کی ٹیم کے خلاف دوسرے ون ڈے انٹرنیشنل سے باہر ہوگئی ہیں۔ 
ندا ڈار نے منگل کے روز کوئنزٹاؤن کے جان ڈیوس اوول میں پہلے ون ڈے انٹرنیشنل میں ٹیم کی قیادت کی، جہاں نیوزی لینڈ کی بیٹنگ کے دوران 44 ویں اوور میں چہرے پر گیند لگنے سے زخمی ہو کر میدان سے باہر چلی گئیں۔ 
اس کے بعد فاطمہ ثناء کو اسٹینڈ ان کپتان مقرر کیا گیا۔ تیسرے ون ڈے انٹرنیشنل کے لیے ندا ڈار کی دستیابی کا تعین بعد میں کیا جائے گا۔
گرین شرٹس کی 22 سالہ فاطمہ ثناء نے مئی 2019 میں جنوبی افریقہ کے خلاف سیریز میں اپنے بین الاقوامی کیریئر کا آغاز کیا تھا، جب وہ جمعہ کے روز کرائسٹ چرچ میں ٹاس کے لئے جائیں گی تو وہ ون ڈے انٹرنیشنل فارمیٹ میں پاکستانی ویمن ٹیم کی 10ویں کپتان بن جائیں گی۔  
قومی ٹیم کی فاسٹ بولر نے انجری کی باعث حالیہ بنگلہ دیش سیریز سے باہر ہونے کے بعد، شاندار واپسی کرتے ہوئے نیوزی لینڈ ویمن کرکٹ ٹیم کے خلاف 3 سے 9 دسمبر تک کھیلے گئے تین ٹی ٹوئنٹی انٹرنیشنل میچوں کی سیریز کی بہترین کھلاڑی کا اعزاز حاصل کیاتھا۔
فاطمہ ثناء نے ٹی ٹوئنٹی انٹرنیشنل میچوں میں 5.60 کے اکانومی ریٹ سے چھ وکٹیں حاصل کیں اور 3 دسمبر کو ڈنیڈن میں کھیلے گئے پہلے ٹی ٹوئنٹی انٹرنیشنل میچ میں تین وکٹیں لے کر میچ کی بہترین کھلاڑی قرار پائیں۔ 
رواں سال جون میں فاطمہ ثناء نے ہانگ کانگ میں منعقدہ اے سی سی ویمنز ایمرجنگ ٹیمز ایشیاء کپ میں پاکستانی ویمن ایمرجنگ ٹیم کی کپتانی کی تاہم سیمی فائنل میں بنگلہ دیش کے ہاتھوں چھ رنز سے شکست کھانے کے بعد ٹیم ایونٹ کے فائنل کیلئے کوالیفائی کرنے سے محروم رہی۔
فاطمہ ثناء نے اس سے قبل ٹی ٹوئنٹی ویمنز کرکٹ ٹورنامنٹ میں پی سی بی بلاسٹرز کی قیادت بھی کی تھی اور ٹائٹل اپنے نام کیا تھا۔ 
کراچی میں پیدا ہونے والی فاطمہ ثناء کو اپنے کیریئر کے آغاز سے ہی شاندار کارکردگی دکھانے پر 2020 میں پی سی بی کا ایمرجنگ کرکٹر آف دی ایئر کا ایوارڈ دیا گیا جبکہ فاطمہ ثناء نے 2021 میں آئی سی سی ایمرجنگ کرکٹر آف دی ایئر کا اعزاز بھی حاصل کیا۔
پاکستانی ویمن کرکٹ ٹیم کی کپتانی ملنے پر فاطمہ ثناء کا کہنا تھا کہ ان کے لیے ون ڈے انٹرنیشنل میں پاکستانی ویمن ٹیم کی قیادت کرنا اعزاز کی بات ہے حالانکہ ندا ڈار کی انجری ہمارے لیے ایک دھچکہ ہے اور میں ان کی جلد صحت یابی کے لئے دعاگو ہوں۔،، 
ان کا کہنا تھا کہ ہم نے نیوزی لینڈ کے خلاف تاریخی ٹی ٹوئنٹی انٹرنیشنل سیریز جیتی تھی اور میں جانتی ہوں کہ کھلاڑی ون ڈے انٹرنیشنل سیریز میں بھی اچھی کارکردگی دکھانے کے لیے کوشاں ہیں۔ اگرچہ پہلے ون ڈے میں ہماری کارکردگی اچھی نہیں تھی، لیکن ہم سب کل کے میچ میں بہترین کارکردگی دکھانے کیلئے تیار ہیں۔،،