سابق چیف سلیکٹرنے کوچ اظہرمحمود کو عہدے سے ہٹانے کامطالبہ کردیا

قومی ٹیم کے سابق چیف سلیکٹر صلاح الدین صلو نے اظہر محمود کو کوچ کے عہدے سے ہٹانے کا مطالبہ کرتے ہوئے کہا ہے کہ اظہرمحمود ٹیم کے کوچ بننے کے اہل نہیں کیونکہ وہ اس کام کی صلاحیت ہی نہیں رکھتے۔ جب بھی انہیں پاکستان کرکٹ کی خدمت کا موقع ملا ہے وہ ڈیلیور کرنے میں ناکام رہے ہیں۔   
تفصیلات کے مطابق سابق ٹیسٹ کرکٹراورچیف سلیکٹر صلاح الدین صلو نے پی سی بی کے چیئرمین محسن نقوی کی پاکستان میں کرکٹ کو بحال کرنے کی کوششوں کی تعریف کی ہے۔ ایکسپریس ٹریبیون سے بات چیت کرتے ہوئے صلاح الدین صلو نے پچھلے کچھ سالوں میں قومی ٹیم کی صلاحیت میں کمی کے رجحان کو تبدیل کرنے میں محسن نقوی کے اقدامات کی اہمیت کو اجاگر کیا۔ 
صلاح الدین صلو نے کہا کہ “میں پی سی بی کے سربراہ محسن نقوی کی جانب سے ہماری کرکٹ کو بین الاقوامی معیار کے مطابق لانے کے لیے کی جانے والی کوششوں کی تعریف کرتا ہوں۔ وہ لوگ جنہوں نے ماضی میں پاکستان کرکٹ ٹیم کو عالمی کرکٹ پر حکمرانی کرتے دیکھا ہے یا کسی بھی حیثیت سے پاکستان کرکٹ سے وابستہ رہے ہیں وہ اس دور کی بحالی کو دیکھنے کے خواہشمند ہیں۔،، 
سابق کرکٹر نے حال ہی میں ہونے والے ٹی20 ورلڈ کپ میں پاکستان کی مایوس کن کارکردگی کے بعد محسن نقوی کے کئی اہم اقدامات کی ستائش کی جن میں سلیکشن کمیٹی کی اصلاح کرنا، کرکٹ کے بنیادی ڈھانچہ کو بہتر بنانا اورہوم کرکٹ میں شرکت کو تمام کھلاڑیوں کے لیے لازمی بنانا شامل ہے۔ 
انہوں نے کہا کہ ٹی ٹوئنٹی ورلڈ کپ 2024 میں پاکستانی ٹیم کی مایوس کن شکست کے بعد ایسے سخت اقدامات ناگزیرہوگئے تھے اور مجھے خوشی ہے کہ چیئرمین پی سی بی نے فوری طور پر ایکشن لیا ہے۔
صلاح الدین صلو نے کہا کہ محسن نقوی نے حال ہی میں بترین اقدامات کیے ہیں۔ وہ انشاء اللہ بہت جلد پھل دیں گے۔‘‘ تاہم صلاح الدین صلو نے پی سی بی کے موجودہ سربراہ کو مشورہ دیا کہ وہ قومی ٹیم کے اسسٹنٹ کوچ اظہرمحمود کو ہٹا کر کسی زیادہ قابل فرد کو تعینات کریں۔
انہوں نے کہا کہ میری رائے میں اظہر ٹیم کے کوچ بننے کے اہل ہی نہیں ہے، جب بھی پاکستان کرکٹ کی خدمت کا موقع ملا ہے وہ ڈیلیور کرنے میں ناکام رہے ہیں۔،،