اب معافی کس کام کی، سابق بھارتی کرکٹرز کے خلاف مقدمہ درج

اب معافی کسی کام کی نہیں،  ہربھجن سنگھ اوردیگر سابق بھارتی کرکٹرز کے خلاف مقدمہ درج کرلیاگیا۔ سوشل میڈیا پر وائرل ہونے والی ویڈیو میں سابق بھارتی کرکٹر ہربھجن سنگھ،یوراج سنگھ، سریش رائنا اور گورکیرت مان کو معذور افراد کا مضحکہ اڑاتے ہوئے لنگڑانے اور اپنی کمر پکڑ کر چلنے کی اداکاری کرتے ہوئے دیکھا جاسکتا ہے۔ 
تفصیلات کے مطابق غلطی کرکے معافی مانگنا کام نہ آیا، معذور افرادکا تمسخراڑانے پر سابق بھارتی کرکٹرز ہربھجن سنگھ، یوراج سنگھ، سریش رائنا اوردیگر کے خلاف مقدمہ درج کر لیا گیا۔ 
گزشتہ دنوں ورلڈ چیمپئن آف لیجنڈز کے فائنل میں پاکستان کو شکست دینے کے بعد ہربھجن سنگھ، یوراج سنگھ، سریش رائنا اور گورکیرت مان نے معذور افراد کی نقل کرتے اور ان کی جسمانی معذوری کا مذاق اڑاتے ہوئے ایک ویڈیو شیئر کی تھی۔ سوشل میڈیا پر ویڈیو وائرل ہونے کے بعد معذورافراد کے حقوق کے حامیوں کی جانب سے ان پر کڑی تنقید کی گئی اور کرکٹرز پر معذور افراد کا مذاق اڑانے کا الزام لگایا گیا جس کے بعد ویڈیو ہٹا دی گئی اور ہربھجن سنگھ نے ویڈیو بنانے پر معافی بھی مانگ لی تاہم سابق بھارتی کرکٹر کی اپنی اس حرکت کے بعد معافی تلافی بھی کام نہ آئی اور ان کے خلاف پولیس نے مقدمہ درج کرلیا ہے۔ 
بھارتی میڈیا کی رپورٹ کے مطابق نیشنل سینٹر فار پروموشن آف ایمپلائمنٹ فار ڈس ایبلڈ پیپل (این سی پی ای ڈی پی) کے ایگزیکٹو ڈائریکٹر ارمان علی نے امر کالونی پولیس اسٹیشن کے ایس ایچ او کو شکایت درج کرائی ہے۔ 
کرکٹرز کے علاوہ میٹا انڈیا کے نائب صدر اور منیجنگ ڈائریکٹر سندھیا دیو ناتھن کے خلاف بھی شکایت درج کرائی گئی ہے۔ 
شکایت میں الزام لگایا گیا ہے کہ میٹا کی ملکیت والے سوشل میڈیا پلیٹ فارم انسٹاگرام نے ایسے مواد کو پوسٹ کرنے کی اجازت دے کر انفارمیشن ٹیکنالوجی ایکٹ 2000 کی خلاف ورزی کی ہے۔ 
ایک پولیس افسر نے بتایا کہ امر کالونی پولس اسٹیشن میں ایک شکایت موصول ہوئی ہے، جس کی مزید تحقیقات کے لیے اس شکایت کو ضلع کے سائبر سیل کے ساتھ شیئر کیا جائے گا۔ 
شکایت میں یہ بھی کہا گیا ہے کی یہ ویڈیو آئین ہند کے آرٹیکل 21 کی سنگین خلاف ورزی ہے، جو ہر شخص کو عزت کے ساتھ جینے کے حق کی ضمانت دیتا ہے چاہے وہ کسی بیماری کا شکار ہو یا کسی جسمانی عارضے میں مبتلا ہو۔