بھارت پرتنقید، روی شاستری کامائیکل وان کوورلڈکپ نہ جیتنےکا طعنہ

سابق بھارتیی لیجنڈ کرکٹر نے ٹی 20 ورلڈ کپ کے شیڈول کے دعووں پر سابق انگلش کرکٹر مائیکل وان کو کڑی تنقید کانشانہ بنایا۔ 
تفصیلات کے مطابق بھارتی ٹیم کے سابق ہیڈ کوچ روی شاستری نے انگلینڈ کے سابق کپتان مائیکل وان کو بھارت کی مخالفت کرنے پر شدید تنقید کا نشانہ بناڈالا۔ 
ایشیزکے فاتح کپتان مائیکل وان نے ٹی ٹوئنٹی ورلڈکپ 2024 میں بھارتی ٹیم کو فیور دینے کا الزام عائد کیا تھا، ان کا کہنا تھا کہ ٹورنامنٹ کا شیڈول ایسا رکھا گیا جس سے صرف بھارت کو فائدہ پہنچے، اب موجودہ بھارتی کمنٹیٹر روی شاستری نے ان کی بات کا جواب دیتے ہوئے سخت لہجہ اختیار کیا ہے۔ 
روی شاستری نے کہا کہ وہ اپنی توجہ انگلینڈ کی ٹیم اورٹی20 ورلڈ کپ میں ان کی کارکردگی پر مرکوز رکھیں جہاں ان کی ٹیم کو سیمی فائنل سے باہر ہونا پڑا، مائیکل جو چاہے کہہ سکتا ہے بھارت میں کسی کو اس قسم کی باتوں کی پروا نہیں ہے۔،، 
بھارت کے سابق آل راؤنڈر شاستری کا کہنا تھا کہ انگلینڈ دو بار ورلڈکپ جیتا ہے لیکن بھارت چار بار جیتا ہے اور میرا نہیں خیال کہ مائیکل وان نے کبھی ورلڈکپ کپ اٹھایا ہے تو انھیں بولنے سے پہلے دو بار سوچنا چاہیے، وہ میرے ساتھی ہیں لیکن ان کے لیے میرا یہی جواب ہے۔،، 
خیال رہے کہ انگلینڈ کے سابق کپتان مائیکل وان نے ٹی ٹوئنٹی ورلڈ کپ 2024 میں سیمی فائنل کے شیڈول پر عدم اطمینان کا اظہار کیا تھا، وان نے ٹرینیڈاڈ میں افغانستان اور جنوبی افریقہ کے درمیان پہلا سیمی فائنل کرانے کے فیصلے پر تنقید کی تھی۔ 
سوشل میڈٖیا ویب سائٹ ایکس پر اپنی پوسٹ میں ان کا کہنا تھا کہ افغانستان نے پیر کی رات سینٹ ونسنٹ میں ورلڈ کپ سیمی فائنل کھیلنے کے لیے کوالیفائی کیا اور منگل کو ٹرینیڈاڈ جانے والی پرواز میں 4 گھنٹے کی تاخیر ہوئی، اس لیے وہ پریکٹس نہ کرسکے اور گرائونڈ کی کنڈیشنز سے ہم آہنگ نہ ہو سکے۔ 
مائیکل وان نے یہ بھی دعویٰ کیا تھا کہ ٹورنامنٹ کا شیڈول بھارت کے حق میں ہے۔ ان کا کہنا تھا کہ یقینی طور پر افغانستان بمقابلہ جنوبی افریقہ سیمی فائنل گیانا میں ہونا چاہیے تھا لیکن چونکہ پورا ایونٹ ہندوستان کی طرف ہے تو میرا خیال ہے کہ یہ دوسروں کے ساتھ بہت غیر منصفانہ رویہ ہے۔