ورلڈ کپ 2023: ایڈم گلکرسٹ نے اپنی 4 سیمی فائنلسٹ ٹیمیں بتادیں

سابق آسٹریلین وکٹ کیپر بیٹر ایڈم گلکرسٹ نے آئی سی سی ورلڈ کپ 2023ء کے لیے اپنے تجربے کی روشنی میں 4سیمی فائنلسٹ ٹیموں کے نام بتا دیئے۔ 
سابق آسٹریلوی وکٹ کیپر ایڈم گلکرسٹ نے رواں سال اکتوبر میں بھارت میں ہونے والے آئی سی سی کرکٹ ورلڈ کپ کے لیے اپنی ٹاپ چار ٹیموں کا انکشاف کیا ہے۔ پریس ٹرسٹ آف انڈیا کے ساتھ ایک حالیہ بات چیت میں، گلکرسٹ نے ٹورنامنٹ کے بارے میں اپنے خیالات کا اظہار کیا۔ ایڈم گلکرسٹ نے بتایا کہ ’’میرے خیال میں بھارت اور پاکستان سیمی فائنل میں حصہ لے سکتے ہیں، آسٹریلیا اور انگلینڈ دوسری دو ٹیمیں ہیں جو ممکنہ طور پر سیمی فائنل میں رسائی حاسل کرسکتی ہیں۔‘‘
انہوں نے مزید کہا کہ آسٹریلیا کو میگا ایونٹ سے قبل بھارت کے خلاف تین میچوں سے اپنی تیاریوں کو بہتر بنانے کا موقع ملے گا۔
"آسٹریلیا جب بھارت آئے گا تو جنوبی افریقہ میں کھیلی گئی اپنی حالیہ سیریز سے بہت کچھ سیکھ کر آئے گا، انہیں بھارت کے خلاف ورلڈ کپ سے پہلے تین میچز ملے ہیں، اس لیے ان کے پاس وہاں ایک مکمل اسکواڈ ہوگا تاکہ ہمیں اس کے بارے میں کچھ بتا سکے کہ وہ کہاں کھڑے ہیں ،اس لیے یہ کہنا قدرے مشکل ہے کہ کون ورلڈ کپ جیتے گا لیکن مجھے لگتا ہے کہ وہاں شاید چار سیمی فائنلسٹ ہوں گے‘‘۔ 
یاد رہے کہ کرکٹ کی دنیا کا سب سے بڑا ایونٹ آئی سی سی ورلڈ کپ 2023 اکتوبر اور نومبر کے دوران بھارت میں ہونے والا ہے، جس میں دنیا بھر سے 10 ٹیمیں حصہ لیں گی۔ ٹورنامنٹ کا آغاز 5 اکتوبر سے ہوگا، فائنل میچ 19 نومبر کو حیدر آباد کے نریندر مودی اسٹیڈیم میں شیڈول ہے جہاں ایک لاکھ سے زائد شائقین بیٹھ کر لائیو ٹاکرے سے لطف اندوز ہوسکتے ہیں۔