بھارت کو اپنی ہوم کنڈیشنز اور کرائوڈ کا فائدہ ہوگا، سابق فاسٹ بولر
٠٤ اگست ٢٠٢٣
آسٹریلیا کے سابق فاسٹ بولر گلین میک گرا نے ورلڈ کپ میں اپنی چار سیمی فائنلسٹ ٹیموں کے بارے میں بتادیا۔
بھارتی نیوز ایجنسی کو دئیے گئے انٹرویو میں سابق آسٹریلوی فاسٹ بولر گلین میک گرا نے کہا کہ ورلڈکپ کے لئے ٹاپ چار ٹیموں میں پاکستان، انگلینڈ، آسٹریلیا اور میزبان بھارت کو دیکھتے ہیں۔
انہوں نے کہا کہ کسی کو چونکنے کی ضرورت نہیں کہ کیوں اِن چار ٹیموں کو ٹاپ فور میں دیکھ رہا ہوں، مجھے لگتا ہے کہ آسٹریلیا بھی میگا ایونٹ جیتنے کی اہلیت رکھتا ہے جبکہ بھارت میزبان ہے، اس کو ہوم کنڈیشنز اور کرائوڈ کا فائدہ ہوگا۔
گلین میک گرا نے کہا کہ پاکستان اور انگلینڈ نے حالیہ عرصے میں بہترین کرکٹ کھیلی ہے، دونوں ٹیموں کے پاس اچھا کمبینیشن ہے اور میں سمجھتا ہوں کہ اِن چار ٹیموں کو سیمی فائنل کیلئے جگہ پکی کرنی چاہئے۔
قبل ازیں رواں سال مارچ میں آسٹریلیا نے بھارت کو 1-2 سے سیریز میں شکست دی تھی جبکہ آئی سی سی ورلڈ ٹیسٹ چیمپئین شپ کے فائنل میں بھی بھارت کو ہراکر ٹائٹل اپنے نام کیا تھا۔
واضح رہے کہ بھارت میں شیڈول ورلڈکپ 2023 کا آغاز 5 اکتوبر سے ہوگا جبکہ میگا ایونٹ کا فائنل 19 نومبر کو احمد آباد میں ہوگا۔
.jpg)
