"اعظم خان خود اپنے کیریئر کے بارے میں سنجیدہ نہیں"  

قومی ٹیم کے سابق ڈائریکٹر محمد حفیظ نے وکٹ کیپر بیٹر اعظم خان کی بین الاقوامی کرکٹ کھیلنے کی صلاحیت پراپنی رائے کا اظہار کردیا۔ محمد حفیظ نے اعظم خان کی فٹنس اور انٹرنیشنل کرکٹ سے وابستگی میں عمد سنجیدگی پر کڑی تنقید کرتے ہوئے اس امر پر زور دیا کہ فٹنس کھیل کا ایک اہم پہلو ہے جسے نظر انداز نہیں کیا جا سکتا، چاہے کسی کھلاڑی کی فطری صلاحیت کچھ بھی ہو،اسے گرائونڈ میں جسمانی طور پر مکمل فٹ ہوناچاہیے۔۔ 
تفصیلات کے مطابق مقامی ٹی وی چینل پر گفتگو کرتے ہوئے سابق کرکٹر محمد حفیظ نے کہا کہ وکٹ کیپر بیٹر اعظم خان کو اپنی فٹنس پر کام کرنے کی اشد ضرورت ہے، پوری پاکستانی ٹیم 10 منٹ میں 2 کلومیٹر کا فاصلہ طے کرسکتی ہے جبکہ اعظم خان کو یہ فاصلہ طے کرنے میں 20 منٹ لگیں گے۔ 
انہوں نے کہا کہ افسوس کی بات ہے کہ اعظم خان بین الاقوامی کرکٹ کھیلنے میں سنجیدہ نہیں ہیں۔  
سابق کرکٹر نے کہا کہ کسی کے دبلاپتلا ہونے یا جسم میں تھوڑا زائد وزن ہونا کوئی مسئلہ نہیں لیکن آپ کو کھیل کے مطابق خود کو ڈھالنا ہوتا ہے، بطور ٹیم ڈائریکٹر میں نے ایک منصوبہ بنایا تھا لیکن اعظم خان ا پنے آپ میں سدھار نہ لاسکے۔  
محمد حفیظ نے کہا کہ آپ اپنی صلاحیتوں کی وجہ سے ٹیم میں ہیں لیکن فٹنس کے معاملے میں آپ کو جواب دینا ہوگا۔ ٹیم میں آپ واحد پلیئر ہیں جس کی فٹنس پر سوالیہ نشان برقرار ہے۔،، 
واضح رہے کہ دورہ انگلینڈ اور ٹی20 ورلڈکپ کے ابتدائی میچز میں اعظم خان کوئی متاثر کن کارکردگی دکھانے میں ناکام رہے تھے جس کے باعث انہیں پلئینگ الیون سے ڈراپ کردیا گیاتھا۔