ہاردک پانڈیا اور نتاشا اسٹینکووچ کا شادی کے 4 سال بعد علیحدگی کا اعلان

بھارتی کرکٹر ہاردک پانڈیا اور سربیا کی اداکارہ نتاشا اسٹینکووچ میں شادی کے چار سال بعد باضابطہ طلاق ہوگئی، بھارت کے اسٹار کرکٹر نے انسٹاگرام پر اس خبر کی تصدیق کی ہے، جو انڈین پریمیئر لیگ (آئی پی ایل) 2024 کے اختتام کے بعد سے افواہوں کا موضوع بنی ہوئی تھی۔
 دوسری جانب سوشل میڈیا پوسٹ پر سربیا کی اداکارہ نے بھی بیان جاری کردیاہے۔ 
18 جولائی 2024 کو نتاشا نے اپنی ایک انسٹاگرام پوسٹ پر ایک تحریری نوٹ کی تصویر لگائی ہے جس میں ہاردک پانڈیا سے علیحدگی کا اعلان کیا گیا ہے، اس پوسٹ میں نتاشا کا کہنا تھا کہ انھوں نے اور ہاردک نے چار سال ساتھ رہنے کے بعد باہمی طور پر الگ ہونے کا فیصلہ کیا تھا۔
تفصیلات کے مطابق بھارتی کرکٹر ہاردک اور نتاشا نے تقریباً ایک سال کی کورٹ شپ کے بعد 2020 میں شادی کی اور اسی سال اپنے بیٹے اگستیہ کا دنیا میں استقبال کیا۔ 
انسٹا گرام پر اپنی پوسٹ میں نتاشا کا کہنا تھا کہ دونوں نے رشتہ برقرار رکھنے کی پوری کوشش کی، ہم اپنے بیٹے آگستیہ کی مشترکہ پیرنٹنگ جاری رکھیں گے۔ 
سربیا سے تعلق رکھنے والی اداکارہ نے اپنے نوٹ میں لکھا کہ ’چار سال ساتھ رہنے کے بعد ہاردک اور میں نے باہمی طور پر الگ ہونے کا فیصلہ کیا ہے، ہم دونوں نے اپنی پوری کوشش کی اور رشتے کو بچانے کے لیے بہت کچھ کیا تاہم ہمیں یقین ہے کہ اب الگ ہونا ہم دونوں کے بہترین مفاد میں ہے۔‘ 
ہاردک پانڈیا کی سابق اہلیہ نے لکھا کہ ’یہ ہم دونوں کے لیے کافی مشکل فیصلہ تھا کیوں کہ اس رشتے نے ہمیں خوشی دی، باہمی احترام دیا اور ہم نے ایک خاندان کے طورکافی وقت ساتھ گزارا۔ ہمیں خدا نے آگستیہ سے نوازا ہے، جو ہم دونوں کی زندگیوں کا مرکزی حصہ رہے گا اور ہم اپنے بچے کی مشترکہ پیرنٹن گ کرتے ہوئے اس بات کو یقینی بنائیں گے کہ ہم دونوں اس کی خوشی کے لیے جو کچھ کرسکتے ہیں وہ کریں۔،، 
آخر میں انھوں نے لکھا ہم آپ سے مخلصانہ طور پر درخواست کرتے ہیں کہ اس مشکل اور حساس وقت میں ہماری پرائیویسی کا احترم کریں۔،،