حارث رؤف ٹی20 میں وکٹوں کی تیزترین سنچری مکمل کرنے والے بولربن گئے  

قومی ٹیم کے فاسٹ بولر حارث رؤف نے کرکٹ کے مختصر فارمیٹ میں وکٹوں کی تیز ترین سنچری مکمل ہونے پر خوشی کا اظہار کرتے ہوئے کہا ہے کہ وکٹوں کی سنچری کرنا یا سب سے زیادہ وکٹیں لینا میرا ہدف نہیں ہے بلکہ پاکستان کی نمائندگی کو اعزاز سمجھتا ہوں اور پاکستان کی ہر جیت میں اپنا حصہ ڈالنا چاہتا ہوں۔  
تفصیلات کے مطابق حارث رؤف نے کینیڈا کے خلاف کھیلے جانے والے ٹی 20 ورلڈکپ کے بائیسویں اور اپنے 71ویں میچ میں وکٹیں لینے کی تیز ترین سنچری مکمل کی۔  
ٹی 20 انٹرنیشنل میں عالمی اعزاز حاصل کرنے پر میچ کے بعد میڈیا سے گفتگو کرتے ہوئے حارث رؤف نے کہا کہ کم یا زیادہ وکٹیں لینا میرا ہدف نہیں بلکہ پاکستان کی نمائندگی کو اپنے لیے اعزاز سمجھتا ہوں، کسی بھی ٹیم کے لیے جیت بہت اہم ہوتی ہے اور ہم بھی اگلا میچ جیتنے کی کوشش کریں گے۔ 
انہوں نے کہا کہ اچھی کرکٹ کھیلی لیکن دو میچ جیت نہ سکے، انجری کے بعد آیا ہوں تو کوشش ہوگی کہ ماضی کی طرح پرفارمنس دوں۔ انہوں نے کہا کہ نیو یارک میں بڑا سکور بنانا مشکل ہوتا ہے۔
حارث رؤف نے کہا کہ ٹیم 2024 کے ٹی 20 ورلڈ کپ میں سپر 8 کے لیے کوالیفائی کرنے کے امکانات سے متعلق حساب کتاب میں مصروف نہیں ہے کیونکہ یہ ہمارا کام نہیں، ہمارا کام گرائونڈ میں پرفارم کرنا ہے اور وہ ہم کرتے رہیں گے۔  
واضح رہے کہ ٹی 20 کرکٹ میں تیز ترین 100 وکٹیں لینے والوں میں افغانستان کے بولر راشد خان پہلے نمبر پر ہیں جنہوں نے 54 میچز میں یہ کارنامہ سرانجام دیا جبکہ دوسرے نمبر پر سری لنکا کے ہسارنگا ہیں جنہوں نے 63 میچز میں یہ اعزاز حاصل کیا۔  
پاکستانی فاسٹ بولر حارث رؤف نے 71ویں میچ میں ٹی 20 فارمیٹ میں 100 وکٹیں حاصل کیں اور تیسرے عالمی بولر بن گئے جبکہ چوتھے نمبر پر آئرلینڈ کے مارک اڈائیر ہیں جنہوں نے 72 میچز میں 100 وکٹیں حاصل کی ہیں۔