بنگلہ دیش اے کیخلاف پاکستان کی زبردست بیٹنگ، ہریرہ کی ناقابل شکست سنچری

پاکستان شاہینز نے محمد ہریرہ کی ناقابل شکست سنچری کی بدولت بنگلہ دیش اے کے خلاف اپنے چار روزہ میچ کا آغاز شاندار کارکردگی کے ساتھ کیا۔ 
ڈاروین میں 19 جولائی یعنی آج سے شروع ہونے والے ٹیسٹ میچ میں پہلے بیٹنگ کرنے کی دعوت ملنے کے بعد پاکستان شاہینز نے پہلے دن ایک مضبوط بنیاد بنائی۔ 
اوپننگ بلے باز صاحبزادہ فرحان اور محمد ہریرہ نے 134 رنز کی شاندار شراکت قائم کی، جس سے پاکستان کو مضبوط آغاز ملا۔ کپتان صاحبزادہ فرحان نے 83 گیندوں پر 66 رنز بنائے اور رپن منڈول کے ہاتھوں آؤٹ ہونے سے قبل 10 چوکے لگائے۔ 
عمر امین نے 77 گیندوں پر 54 رنز کی شاندار اننگز کھیل کر اننگز کو مزید مضبوط کیا، جس میں آٹھ چوکے شامل تھے۔ 
بنگلہ دیش اے کے لیے رپن منڈول شاندار بولر رہے، جنہوں نے دونوں دبنگ بلے بازوں کی وکٹیں لیں۔ 
پہلے دن کے اختتام تک، پاکستان شاہینز نے 2 وکٹوں کے نقصان پر 375 رنز بنائے تھے۔ محمد ہریرہ نے 203 گیندوں پر ناقابل شکست 161 رنز بنائے، جس میں 18 چوکے اور ایک چھکا شامل تھا۔ 
کامران غلام بھی ففٹی تک پہنچ گئے، جنہوں نے دن کا اختتام 114 گیندوں پر 74 رنز کے ساتھ کیا، جس میں 11 چوکے بھی شامل تھے۔ 
چار روزہ میچ 2008 کے بعد پاکستان اور بنگلہ دیش کے درمیان پہلا باضابطہ مقابلہ ہے۔ سولہ سال پہلے، پاکستان اکیڈمی کی ٹیم نے بنگلہ دیش کا دورہ کیا اور بنگلہ دیش اکیڈمی کی ٹیم کے خلاف دونوں میچ آٹھ وکٹوں سے جیتے تھے۔ 
افتتاحی میچ کے بعد، یہ سیریز جمعہ 26 جولائی سے شروع ہونے والے دوسرے میچ کے ساتھ جاری رہے گی، اس کے بعد 4 اور 6 اگست کو دو ایک روزہ میچز اور 9 سے 18 اگست تک نو ٹیموں کی ٹاپ اینڈ ٹی ٹوئنٹی سیریز ہوگی۔ 
پاکستان شاہینز کا اسکواڈ:
صاحبزادہ فرحان (کپتان)، فیصل اکرم، حسیب اللہ، کامران غلام، کاشف علی، خرم شہزاد، مہران ممتاز، محمد علی، محمد ہریرہ، مبصر خان، محمد عرفان خان، عمیر بن یوسف، شاہنواز دھانی، طیب طاہر اور عمر امین۔ 
بنگلہ دیش 'اے' کا اسکواڈ:
محمود الحسن جوئے (کپتان)، ایچ مولا، امیت حسن، عارف اسلام، حسن مراد، ماہید الاسلام انکون، معروف مریدھا، محمد مقید الاسلام، پرویز حسین ایمون، رقیب الحسن، رضا الرحمان راجہ، رپن مونڈل، سعادت حسین دیپو، شادمان اسلام، ایس کے پرویز الرحمان جبون۔