سال 2004 کے بعد یہ پہلا موقع ہے کہ آئی سی سی کے دو ٹاپ آفیشلز پاکستان آرہے ہیں، پی سی بی
٢٩ مئی ٢٠٢٣
انٹرنیشنل کرکٹ کونسل (آئی سی سی) کے چیرمین گریگ بارکلے اور چیف ایگزیکٹیو جیف ایلرڈائس 2 روزہ دورے پر منگل کے روز لاہور پہنچیں گے۔
پاکستان کرکٹ بورڈ (پی سی بی) کی جانب سے جاری کردہ اعلامیے میں کہا گیا ہے کہ آئی سی سی آفیشلز سے مینجمنٹ کمیٹی کے سربراہ نجم سیٹھی، چیف آپریٹنگ آفیسر (سی ای او) سلمان نصیر اور دیگر حکام سے ملاقات کریں گے۔
جیف ایلرڈائس آئی سی سی کے چیف ایگزیکٹیو اور جنرل منیجر کی حیثیت سے پہلے بھی پاکستان آچکے ہیں البتہ گریگ بارکلے کا یہ پاکستان کا پہلا دورہ ہوگا۔
گریگ بارکلے 15 سال کے عرصے میں پاکستان آنے والے آئی سی سی کے پہلے چیئرمین ہیں، آخری بار2008ء میں آئی سی سی کے صدر رے مالی نے پاکستان کا دورہ کیا تھا۔
واضح رہے کہ اکتوبر 2004ء کے بعد یہ پہلا موقع ہے کہ آئی سی سی کے دو ٹاپ آفیشلز پاکستان کرکٹ بورڈ کے ہیڈ کوارٹر کا دورہ کریں گے۔ توقع ہے کہ ورلڈ کپ 2023 اور کرکٹ سے جُڑے دیگر اہم موضوعات پر سیرحاصل بات چیت کی جائے گی۔
.jpg)
