کھلاڑیوں کی نئی ٹیسٹ رینکنگ جاری، بابراعظم اور شاہین آفریدی کی ترقی

آئی سی سی ورلڈ ٹیسٹ چیمپئین شپ میں پاکستان بدستور پہلے نمبر پر قابض ہے۔ 
انٹرنیشنل کرکٹ کونسل (آئی سی سی) نے ٹیسٹ کرکٹرز کی نئی رینکنگ جاری کردی، جس میں قومی کرکٹ ٹیم کے کپتان بابر اعظم اور فاسٹ بولر شاہین شاہ آفریدی کی ترقی ہوئی ہے۔ 
انگلینڈ اور آسٹریلیا کے درمیان ہونے والی ایشز سیریز کے اختتام کے ساتھ ہی آئی سی سی ورلڈ ٹیسٹ چیمپئین شپ کی تازہ ترین رینکنگ سامنے آگئی۔ 
بیٹرز کی رینکنگ: 
آئی سی سی کی جانب سے جاری کردہ کھلاڑیوں کی نئی ٹیسٹ رینکنگ میں نیوزی لینڈ کے کین ولیمسن کی پہلی پوزیشن برقرار ہے جبکہ انگلینڈ کے مڈل آرڈر بیٹر جو روٹ ایک درجے ترقی کے بعد دوسرے نمبر پر آ گئے ہیں۔ 
آسٹریلیا کے اسٹیو اسمتھ 2 درجے ترقی کے بعد تیسرے نمبر پر آگئے جبکہ پاکستان ٹیم کے کپتان بابر اعظم کی رینکنگ میں بھی 2 درجے بہتری آئی ہے اور بابر اعظم چھٹے سے چوتھے نمبر پر پہنچ گئے ہیں۔ 
آسٹریلیا کے مارنس لبوشین 3 درجے تنزلی کے بعد پانچویں نمبر پر چلے گئے ہیں جبکہ آسٹریلیا کے ٹریوس ہیڈ 2 درجے تنزلی کے بعد چھٹے نمبر پر پہنچ گئے ہیں۔ 
آسٹریلیا کے عثمان خواجہ ساتویں اور انگلینڈ کے ہیری بروک نویں نمبر پر آ گئے جبکہ پاکستان کے سعود شکیل 15 اور عبداللہ شفیق 21 ویں نمبر پر موجود ہیں۔ 
بولرز کی رینکنگ: 
ٹیسٹ بولرز کی رینکنگ میں بھارت کے روی چندرن ایشون کی پہلی پوزیشن برقرار ہے جبکہ بھارت ہی کے رویندرا جڈیجا 2 درجے ترقی کے بعد تیسرے نمبر پر آگئے ہیں۔ 
انگلینڈ کے اسٹیورٹ براڈ 2 درجے ترقی کے بعد چوتھے نمبر پر آگئے جبکہ آسٹریلیا کے پیٹ کمنز کی رینکنگ میں 2 درجے تنزلی ہوئی جس کے بعد وہ پانچویں نمبر پر آگئے ہیں۔
پاکستان کے نوجوان فاسٹ بولر شاہین شاہ آفریدی کی رینکنگ میں 3 درجے بہتری ہوئی ہے اور وہ چھٹے نمبر پر آگئے ہیں جبکہ انگلینڈ کے جیمز اینڈرسن 4 درجے تنزلی کے بعد 8 ویں نمبر پر چلے گئے ہیں۔ 
مچل اسٹارک ایک درجے ترقی کے بعد 13 ویں جبکہ انگلینڈ کےکرس ووکس 7 درجے بہتری کے بعد 23 ویں نمبر پر آگئے ہیں۔ 
ٹیم کی رینکنگ:
آئی سی سی ورلڈ ٹیسٹ چیمپئین شپ کی رینکنگ میں سری لنکا کے خلاف دو ٹیسٹ میچوں میں کامیابی کے ساتھ 24 پوائنٹس کے ہمراہ پاکستان پہلی پوزیشن پر قابض ہے جبکہ بھارتی ٹیم ایک فتح اور ایک ڈرا میچ کے ساتھ 16 پوائنٹس کے ہمراہ دوسری پوزیشن پر موجود ہے۔
رینکنگ میں دفاعی چیمپئین آسٹریلیا اور انگلینڈ کی ٹیمیں بالترتیب 5، 5 میچوں میں 2 فتح، 2 بار ہار اور ایک ڈرا میچ کے ساتھ 26 پوائنٹس کے ہمراہ تیسری اور پانچویں پوزیشن پر براجمان ہیں۔ 
اسی طرح ویسٹ انڈیز اور سری لنکا کی ٹیموں نے 2، 2 میچز کھیل رکھے ہیں تاہم کالی آندھی ایک فتح اور ایک ڈرا میچ کے ساتھ 4 پوائنٹس کے ساتھ چوتھے اور لنکن ٹائیگرز مسلسل دو میچز ہار کر چھٹی پوزیشن پر موجود ہیں۔ 
آئی سی سی ورلڈ ٹیسٹ چیمپئین شپ کی اس سائیکل میں بنگلہ دیش، نیوزی لینڈ اور جنوبی افریقہ کی ٹیموں نے ابھی تک کوئی میچ نہیں کھیلا ہے۔
دوسری جانب انگلینڈ کے دو ایشز اسٹارز اور ایک نوجوان ڈچ کھلاڑی کو جولائی 2023 کے لیے آئی سی سی کے مینز پلیئر آف دی منتھ ایوارڈ کے لیے نامزد کیا گیا ہے۔ 
زیک کرولی (انگلینڈ)
ممکنہ طور پر بلے کے ساتھ انگلینڈ کی سوچ میں تبدیلی کا بہترین مجسمہ، زیک کرولی ترتیب کے اوپری حصے میں جگہ بنارہے ہیں۔ 
دائیں ہاتھ کے یہ کھلاڑی حال ہی میں ختم ہونے والی ایشز میں نئی ​​گیند کے خلاف بھی انگلینڈ کے لیے سب سے زیادہ رنز بنانے والے کھلاڑی تھے اور وہ خاص طور پر جولائی میں اپنی اننگز میں نمایاں رہے، خاص طور پر اولڈ ٹریفورڈ میں ان کے 189 رنز قابلِ ذکر ہیں۔ 
کرس ووکس (انگلینڈ) 
ہیڈنگلے میں تیسرے ایشز ٹیسٹ کے لیے انگلینڈ کی ٹیم میں شامل کرس ووکس نے سیریز کا رخ موڑنے میں اہم کردار ادا کیا، آل راؤنڈر نے یقینی طور پر ایک تاثر بنایا۔ 34 سالہ کھلاڑی نے پہلی صبح ہی دائیں ہاتھ کے بلے باز مارنس لیبوشین کو کریز سے ہٹانے کے لیے ان کے بلے کا بیرونی کنارہ ڈھونڈ لیا، اس کامیابی کے بعد وہ ٹریوس ہیڈ اور مچل مارچ کو ہٹانے کے لیے واپس آئے، جس سے میزبان آسٹریلیا کو صرف 263 رنز تک محدود رکھنے میں مدد ملی۔ دوسرے سرے پر مارک ووڈ کے ساتھ 32 ناٹ آئوٹ کے اسکور میں جیتنے والے رنز بنانے سے پہلے آسٹریلیا کی دوسری اننگز میں 224 رنز پر مزید تین وکٹیں حاصل کیں۔