آئی سی سی نے کرکٹ کو شامل کرنےکےلیے اولمپکس کمیٹی کوسبزباغ دکھادیے

انٹرنیشنل کرکٹ کونسل (آئی سی سی) نے کرکٹ کو اولمپکس میں شامل کروانے کی درخواست دے دی۔

غیر ملکی میڈیا رپورٹس کے مطابق آئی سی سی کی جانب سے انٹرنیشنل اولمپک کمیٹی (آئی او سی) کو سبز باغ دکھاتے ہوئے موقف رکھا ہے کہ کرکٹ کو اولمپکس کا حصہ بناکر بھارت کی مارکیٹ میں بڑی کمائی کی جاسکتی ہے۔

دنیا بھر میں کرکٹ کے ایک رب سے زیادہ فینز ہیں اور 90 فیصد شائقین کرکٹ دیکھنا چاہتے ہیں اس لیے کرکٹ کو اولمپکس کا حصہ بنایا جائے، کرکٹ کو شامل کرنے سے بھارت میں اولمپکس رائٹس کی مد میں 130 سے 260 ملین ڈالر مل سکتے ہیں۔ 

پیرس اولمپکس 2024 کے لئے آئی او سی کو محض 31 ملین ڈالر کے رائٹس ملے ہیں۔

دوسری جانب اولمپکس میں کرکٹ کو شامل کرنے کے لئے انٹرنیشنل کرکٹ کونسل (آئی سی سی) کی جانب سے بھارتی بورڈ کے سربراہ جے شاہ کی سربراہی میں ایک کمیٹی تشکیل دی گئی ہے۔

آئی سی سی کی تجویز ہے کہ اولمپکس میں مرد اور خواتین کی 6،6 کرکٹ ٹیمیں ٹی20 فارمیٹ پر کھیلیں گی تاہم کرکٹ کو اولمپس کھیلوں میں شامل کرنے کا حتمی فیصلہ ممبئی میں آئی او سی کی اکتوبر میں ہونے والی میٹنگ میں کیا جائے گا۔

واضح رہے کہ آئی سی سی کے نئے فنانشل ماڈل کے تحت بھارتی بورڈ سب سے زیادہ کمائی کرے گا، جس کو سالانہ 38.5 فیصد حصہ دینے کی تجویز سامنے آئی ہے یعنی بھارتی بورڈ سالانہ 230 ملین ڈالر حاصل کرے گا جو پاکستانی روپوں میں 66 ارب روپے سے زائد بنتے ہیں۔