ٹی 20 ورلڈکپ کے باعث امریکہ میں کرکٹ کی مقبولیت میں اضافہ ہُوا

آئی سی سی کی رپورٹ کے مطابق ٹی ٹوئنٹی ورلڈ کپ کے بعد امریکہ میں کرکٹ کی مقبولیت میں اضافہ ہوا ہے۔ آئی سی سی کے ہیڈ آف ایونٹس کرس ٹیٹلی نے امریکہ میں ایونٹ کی کامیابی پر خوشی کا اظہار کرتے ہوئے امریکی شہریوں کی کرکٹ میں بے مثال دلچسپی کو اجاگر کیا۔ 
تفصیلات کے مطابق انٹرنیشنل کرکٹ کونسل (آئی سی سی) نے تصدیق کی ہے کہ ٹی20 ورلڈکپ 2024 کے انعقاد کی وجہ سے امریکا میں کرکٹ دیکھنے والے شائقین میں اضافہ ہوا ہے۔ آئی سی سی کے مطابق پہلی بار ایونٹ کی میزبانی کرنے والے امریکا کے 3 اسٹیڈیمز نے 16 میچز کی میزبانی کی۔ 
ٹیکساس میں ٹی20 ورلڈکپ کے 4 میچوں میں 22,000 سے زیادہ لوگوں نے شرکت کی، امریکی شائقین نے بھی اپنی ٹیم کو اسی گراؤنڈ پر پاکستان کو شکست دے کر تاریخ رقم کرتے دیکھا۔ 
نیو یارک کا ناساؤ کاؤنٹی اسٹیڈیم شائقین کی گنجائش اور سہولیات کے لحاظ سے سب سے بڑا تھا، جہاں 9 جون کو بھارت اور پاکستان کے درمیان ہائی وولٹیج ٹاکرے میں ریکارڈ 34,028 شائقین نے شرکت کی اور لو اسکورنگ سنسنی خیز مقابلے کو دیکھا۔ 
بھارت بمقابلہ امریکا میچ دیکھنے کے لئے اسی گراؤنڈ پر31 ہزار 722 شائقین کرکٹ نے جگہ حاصل کی اور اس سنسنی خیز میچ کودیکھا جبکہ مجموعی طور پر 1 لاکھ 65 ہزار سے زائد فینز نے اسٹیڈیم کا رخ کیا۔  
واضح رہے کہ امریکا کے کُل تین مقامات پر آئی سی سی ٹی20 ورلڈکپ کے 16 میچز کھیلے گئے، ان گراؤنڈز میں ٹیکساس کا گرینڈ پریری اسٹیڈیم، نیویارک کا ناساؤ کاؤنٹی انٹرنیشنل کرکٹ اسٹیڈیم اور فلوریڈا کا سینٹرل بروورڈ ریجنل پارک اسٹیڈیم شامل تھا۔