عماد وسیم نے بابراعظم کو ’دنیا کا بہترین کھلاڑی‘ قرار دے دیا

عماد وسیم نے پاکستانی کپتان کے بارے میں یہ ریمارکس ہفتے کو نیوزی لینڈ کے خلاف دوسرے ٹی ٹوئنٹی انٹرنیشنل میچ میں ان کی شان دار سینچری اننگز کے بعد دیے۔

دوسرے ٹی ٹوئنٹی میچ میں  قومی ٹیم کے کپتان  نے 174.13 کے اسٹرائیک ریٹ سے  58 گیندوں پر 101 رنز کی دھواں دار اننگز کھیلی تھی۔ ان کی اننگز میں 11 چوکے اور  تین چھکے شامل تھے۔

میچ کے بعد بابراعظم سے گفتگو  کرتے ہوئے عماد وسیم نے کہا کہ مجھے یقین ہے کہ وہ اس وقت دنیا کے بہترین  کھلاڑی ہیں۔

عماد وسیم نے کہا کہ’’میں نے بہت سی اننگز دیکھی ہیں مگر میری رائے میں ان کی یہ اننگز سب سے بہتر تھی، خاص طور پر تین وکٹیں گرنے کے بعد انہوں نے جس انداز سے اننگز کو آگے بڑھایا اور قومی ٹیم کے مجموعی اسکور میں اضافہ کیا وہ لاجواب تھا۔ اس میں کوئی شک نہیں کہ وہ دنیا کے بہترین کھلاڑی ہیں۔‘‘

اس موقع پر بابراعظم  نے  ٹی ٹوئنٹی انٹرنیشنل میچوں میں اپنی تیسری سینچری کی تکمیل پر خوشی کا اظہار کرتے ہوئے کہا کہ میں اس میچ میں پرفارم کرکے بہت خوش ہوں۔ میرے ساتھ دو اچھی پارٹنرشپس بنیں اور پھر ہمارے بولروں نے بہترین پرفارم کرتے ہوئے میچ جیتنے میں اہم کردار ادا کیا۔

واضح رہے کہ پاکستان کو اب لاہور میں (17 اپریل) اور راولپنڈی (20 اور 24 اپریل) میں کھیلے جانے والے آخری تین میچوں کے ساتھ پانچ میچوں کی سیریز میں 2-0 کی برتری پر ہے۔