امام الحق ہوم گراؤنڈ پر شاندار کارکردگی دِکھانے کے لیے پُراعتماد

ون ڈے کرکٹ میں پاکستانی ٹیم کے لیے تسلسل کے ساتھ عمدہ کارکردگی دکھانے والے امام الحق کا تعلق ملتان سے ہے، بدھ کو یہاں گرین شرٹس کیریبیئنز کے خلاف میدان میں اتریں گے تو اوپنر کو بھی پہلی بار اپنے آبائی شہر میں ون ڈے سیریز کھیلنے کا موقع ملے گا، اتفاق سے یہ ان کے کیریئر کا 50واں ون ڈے میچ بھی ہے۔

پی سی بی کی جانب سے جاری کیے جانے والے انٹرویو میں امام الحق نے کہا ہے کہ یہاں اپنے چچا انضمام الحق کو کھیلتے ہوئے دیکھا ہے،ملتان میں اپنا پہلا میچ کھیلنے اور عمدہ کارکردگی دکھانے کے لیے بیتاب ہوں، میری پیدائش اسی شہر میں ہوئی، بعد ازاں بچپن میں لاہور منتقل ہوگئے،اسٹیڈیم سے کئی یادیں وابستہ ہیں۔

اوپنر نے کہا کہ کیریئر میں اتار چڑھاؤ کے دوران فیملی اور ٹیم میں موجود ساتھیوں کی بھرپور اسپورٹ رہی،اپنی کرکٹ سے ہمیشہ لطف اندوز ہوا اور ابھی تک جو حاصل کیا، اس پر مطمئن ہوں،کارکردگی کا تسلسل برقرار رکھنے کیے لیے پُرعزم ہوں، ہوم گراؤنڈ پر کیریئر کا 50 واں ون ڈے میچ کھیلنے کا موقع ملنا خوش آئند ہے، اس کو اپنی کارکردگی سے یادگار بنانے کی کوشش کروں گا۔

یاد رہے کہ امام الحق نے ڈیبیو کے بعد ابھی تک 54 کی اوسط سے 2321رنز بنائے ہیں، جو اس عرصہ میں بابر اعظم کے بعد کسی بھی پاکستانی بیٹر سے زیادہ اسکور ہے، اوپنر نے ڈیبیو پر سنچری کے بعد بھی 8تھری فیگر اننگز کھیلی ہیں۔