ٹی 20 ورلڈ کپ2024: جنوبی افریقہ کو ہراکر بھارت دوسری بارچیمپئن بن گیا  

ٹی 20 ورلڈ کپ 2024 کے فائنل میں بھارت سنسنی خیز مقابلے میں جنوبی افریقہ کو 7 رنز سے شکست دے کر دوسری بار عالمی چیمپئن بن گیا۔
تفصیلات کے مطابق کینسنگٹن اوول اسٹیڈیم بارباڈوس میں کھیلے گئے میچ میں جنوبی افریقی ٹیم ایک بار پھر بڑے مقابلے میں چُوک کرگئی اور بھارت کے 176 رنز کے جواب میں 20 اوورز میں 8 وکٹوں کے نقصان پر 169 رنز بناسکی۔ 
اس سے قبل بھارت 2007 میں پاکستان کو شکست دیکر پہلی بار ٹی 20 چیمپئن بنا تھا۔ بھارت اس ٹورنامنٹ میں فائنل تک ناقابل شکست رہا اور یہ ٹی 20 کی تاریخ میں پہلا موقع ہے جب کسی ٹیم نے بغیر کوئی میچ ہارے ٹرافی جیتی ہے۔ 
میگا ایونٹ میں شاندار بولنگ کرنے پر جسپریت بھمراہ کو پلیئر آف دی ٹورنامنٹ کا ایوارڈ دیا گیا، انہوں نے آٹھ میچز میں 15 وکٹیں حاصل کیں جبکہ فائنل معرکے میں 76 رنز کی اننگز پر ویرات کوہلی مین آف دی میچ قرار پائے۔ 
بھارت کی جانب سے دیئے گئے ہدف کے تعاقب میں جنوبی افریقہ کے ہینری کلاسن 52 رنز، کوئنٹن ڈی کوک 39 رنز اور ٹرسٹن اسٹبس 31 رنز کے ساتھ نمایاں رہے۔ ریزا ہینڈرکس اور ایڈن مارکرم نے 4، 4 رنزبنائے، مارکو جینسن 2 اور کاگیسو ربادا 4 رنز بناکر آؤٹ ہوئے، کیشو مہاراج 2 اور اینرچ نورٹجے 1 رن کے ساتھ ناٹ آؤٹ رہے۔ 
بھارت کی طرف سے ہاردک پانڈیا نے 3، ارشدیپ سنگھ اور جسپریت بھمراہ نے 2، 2 اور اکشر پٹیل نے ایک کھلاڑی کو آؤٹ کیا۔ 
قبل ازیں بھارت نے ٹاس جیت کر پہلے بیٹنگ کرتے ہوئے 20 اوورز میں 7 وکٹوں کے نقصان پر 176 رنز بنائے۔ ویرات کو ہلی 76 اور اکشر پٹیل 47 رنز کے ساتھ نمایاں رہے۔ 
بھارت کی پہلی اور دوسری وکٹ 23 رنز کے مجموعی اسکور پر گریں، کپتان روہت شرما 9 رنز بنا کر کیچ آؤٹ ہوگئے جبکہ ان کے فوراً بعد بیٹنگ کے لئے آنے والے رشبھ پنت بھی کھاتا کھولے بغیر پویلین لوٹ گئے۔ بھارت کو تیسرا نقصان 34 رنز کے مجموعی اسکور پر اٹھانا پڑا جب سوریا کمار یادو 3 رنز بناکر کیچ تھما گئے۔ 
بھارت کی چوتھی وکٹ 106 رنز پر گری جب اکشر پٹیل 47 رنز بنانے کے بعد رن آؤٹ ہوکر پویلین لوٹ گئے۔ 163 رنز کے مجموعی اسکور پر ویرات کوہلی 76 رنز بناکر آؤٹ ہوگئے۔ 
آخری اوور میں شیوم دوبے 27 اور رویندرا جڈیجا 2 رنز بناکر آؤٹ ہوگئے۔ ہاردک پانڈیا 5 رنز کے ساتھ ناٹ آؤٹ رہے۔ 
جنوبی افریقہ کی طرف سے کیشو مہاراج اور اینرچ نورٹجے نے 2، 2 جبکہ کاگیسو ربادا اور مارکو جینسن نے ایک، ایک وکٹ حاصل کی۔ 
فائنل کے لئے بھارت اور جنوبی افریقہ نے وننگ کمبی نیشن کو برقرار رکھا اور دونوں ٹیموں میں کوئی تبدیلی نہیں کی گئی۔ 
دونوں ٹیموں کی پلیئنگ الیون: 
بھارت: روہت شرما (کپتان)، ویرات کوہلی، رشبھ پنت (وکٹ کیپر)، سوریا کمار یادو، شیوم دوبے، ہاردک پانڈیا، اکسر پٹیل، رویندر جڈیجا، 9 ارشدیپ سنگھ، کلدیپ یادیو، جسپریت بھمراہ۔
جنوبی افریقہ: کوئنٹن ڈی کوک (وکٹ کیپر)، ریزا ہینڈرکس، ایڈن مارکرم (کپتان)، ہینری کلاسن، ڈیوڈ ملر، ٹرسٹن اسٹبس، مارکو جانسن، کیشو مہاراج، کاگیسو ربادا، اینریچ نورٹجے، تبریز شمسی۔