ورلڈ چیمپئین شپ آف لیجنڈز کے فائنل میں بھارت نے پاکستان کو شکست دے دی

ورلڈ چیمپئین شپ آف لیجنڈز کے فائنل میں بھارت نے پاکستان کو 5 وکٹوں سے شکست دے دی۔ 
تفصیلات کے مطابق برمنگھم کے ایجبسٹن اسٹیڈیم میں کھیلے گئے فائنل میچ میں پاکستان چیمپئن نے ٹاس جیت کر پہلے بیٹنگ کرتے ہوئے 20 اوورز میں 6 وکٹوں کے نقصان پر 156 رنز بنائے۔ جواب میں بھارت نے 157 رنز کا ہدف 19.1 اوورز میں 5 وکٹوں کے نقصان پر حاصل کرلیا۔ 
پاکستان کی طرف سے شعیب ملک 41، کامران اکمل 24 اور صہیب مقصود 21، رنز کے ساتھ نمایاں رہے۔ 
شرجیل خان نے 12، یونس خان اور عامر یامین نے 7، 7 رنز اسکور کیے۔ مصباح الحق 18 رنز بناکر ناٹ آؤٹ رہے۔ شاہد آفریدی صرف 4 رنز بناسکے جبکہ سہیل تنویر 19 رنز کے ساتھ ناٹ آؤٹ رہے۔ 
بھارت کی طرف سے انوریت سنگھ نے 3، عرفان پٹھان، پون نگی اور ونے کمار نے ایک، ایک وکٹ حاصل کی۔ 
ہدف کے تعاقب میں بھارت کی طرف سے امباتی رایودو نے نصف سنچری اسکور کی، گرکیرت سنگھ مان 34 اور یوسف پٹھان 30 رنز کے ساتھ نمایاں رہے۔ روبن اتھاپا نے 10 اور سریش رائنا نے 4 رنز اسکور کیے۔ یووراج سنگھ 15 اور عرفان پٹھان 5 رنز کے ساتھ ناٹ آؤٹ رہے۔ 
پاکستان کی طرف سے عامر یامین نے 2، سعید اجمل، وہاب ریاض اور شعیب ملک نے ایک، ایک وکٹ حاصل کی۔  
واضح رہے کہ پہلے سیمی فائنل میں پاکستان نے ویسٹ انڈیز کو ہرایا تھا جبکہ بھارت نے آسٹریلیا کو شکست دیکر فائنل کھیلنے کا اعزاز حاصل کیا تھا۔ 
قومی ٹیم نے گروپ راؤنڈ میں غیر معمولی پرفارمنس کا مظاہرہ کرتے ہوئے 5 میں 4 میچز میں کامیابی سمیٹی جبکہ روایتی حریف بھارت کو بھی شکست سے دوچار کیا تھا۔ 
بھارتی ٹیم نے انگلینڈ اور ویسٹ انڈیز کے خلاف پے در پے 2 میچز میں کامیابیاں سمیٹیں جبکہ سیمی فائنل میں آسٹریلیا کو زیر کیا۔ 
پاکستان کا اسکواڈ: 
کپتان یونس خان، کامران اکمل، شرجیل خان، صہیب مقصود، شعیب ملک، شاہد آفریدی، عامر یامین، مصباح الحق، وہاب ریاض، سہیل تنویر، سہیل خان، سعید اجمل، عمر اکمل تنویر احمد، یاسر عرفات، محمد حفیظ، توفیق عمر، عبدالرزاق۔ 
بھارت کا اسکواڈ: 
کپتان یوراج سنگھ، رابن اتھپا، امباتی رائیڈو، سریش رائنا، یوسف پٹھان، عرفان پٹھان، گورکیرت سنگھ، پون نیگی، ونے کمار، ہربھجن سنگھ، دھول کلکرنی، راہول شکلا، آر پی سنگھ، نمن اوجھا، سوربھ تیواری، انوریت سنگھ، راہول شرما۔