بھارتی کرکٹ بورڈ (بی سی سی آئی) انڈین پریمئیر لیگ (آئی پی ایل) کے پلے آف مرحلے کے میچز کے دوران ہونے والی ہر ڈاٹ بال پر 500 درخت لگائے گا۔

بھارتی میڈیا کی رپورٹس کے مطابق ماحولیاتی تحفظ کے لئے بی سی سی آئی نے پورے ہندوستان میں بڑے پیمانے پر درخت لگانے کا منفرد اقدام اٹھایا ہے جس کو دنیا بھر میں خوب سراہا جارہا ہے۔

گزشتہ روز آئی پی ایل کے پہلے کوالیفائر میچ میں گجرات ٹائٹنز اور چنائی سپر کنگز کی ٹیمیں چدمبرم اسٹیڈیم میں ایک دوسرے کے مدمقابل آئیں، اس میچ میں چنائی نے فتح حاصل کی اور فائنل کے لئے کوالیفائی کرلیا تاہم میچ سے قبل بورڈ نے ہر ڈاٹ بال پر ہندوستان میں 500 درخت لگانے کا اعلان کیا۔

 رپورٹس میں بتایا گیا ہے کہ میچ کے دوران دونوں ٹیموں کے بالرز کی جانب سے 84 ڈاٹ بالز کروائی گئیں جس کا مطلب ہے کہ بھارتی بورڈ 42 ہزار درخت لگائے گا اور یہ سلسلہ اگلے تین میچز تک جاری رہے گا۔

 بورڈ کی جانب سے آئی پی ایل میچ کے دوران لائیو کمنٹری میں اس دلچسپ پیشرفت کا انکشاف کیا گیا، لیگ کے آفیشل براڈکاسٹرز نے تخلیقی طور پر اسکور کارڈ پر ڈاٹ بال کے بجائے درخت کا ایموجی دکھایا، جو ایک اہم ماحولیاتی اقدام کی طرف اشارہ تھا۔

اس اقدام کو گرین ڈاٹ بالز کا نام دیا گیا ہے، لائیو کمنٹری کے دوران نشریاتی اداروں کا تذکرہ کرتے ہوئے شائقین کرکٹ کو آگاہی فراہم کی گئی۔