عرفان پٹھان آئی پی ایل ادھورا چھوڑنےوالے انگلش کھلاڑیوں پربرس پڑے

سابق بھارتی پیسر عرفان پٹھان انگلینڈ کے کھلاڑیوں سے اس لیے ناراض ہیں کہ وہ پاکستان کے ساتھ شیڈول ٹی 20 سیریزکھیلنے کے لیے آئی پی ایل کو ادھورا چھوڑ کرجارہے ہیں۔ عرفان پٹھان نے غیر ملکی کھلاڑیوں کے خلاف سخت موقف اپناے ہوئے اس نقطے پر زور دیا کہ غیر ملکی کھلاڑی یا تو آئی پی ایل کا پورا سیزن کھیلنے کے لیے عہد کریں یا مکمل طور پر ایونٹ سے باہر رہیں۔
تفصیلات کے مطابق ٹی20 ورلڈکپ 2024 سے قبل پاکستان کے ساتھ سیریزکھیلنے کےلئے انڈین پریمئیر لیگ (آئی پی ایل) ادھورا چھوڑ جانے والے انگلش کرکٹرز کیخلاف سابق بھارتی فاسٹ بولر عرفان پٹھان نے سخت زبان استعمال کرنا شروع کردی۔ سماجی رابطے کی ویب سائٹ ایکس (ٹوئٹر) پر ٹوئٹ کرتے ہوئے سابق بھارتی کرکٹر عرفان پٹھان نے لکھا کہ ’’یا تو پورے سیزن کے لئے اپنی موجودگی یقینی بنائیں یا نہ آئیں‘‘۔ 
قبل ازیں سابق کرکٹر سینل گواسکر بھی انڈین پریمئیر لیگ (آئی پی ایل) کو ادھورا چھوڑ کرجانے والے انگلش کرکٹر پر شدید برہم ہوگئے تھے، انہوں نے انگلش کرکٹرز کو تنقید کا نشانہ بناتے ہوئے انکی تنخواہوں میں کٹوتی اور جرمانے کا مطالبہ کیا تھا۔ سنیل گواسکر نے اپنے کالم میں دیگر بورڈز کو یہ احساس دلاتے ہوئے کہا تھا کہ آئی پی ایل لیگ کے باعث انہیں 10 فیصد کمیشن ملتا ہے جو کوئی اور لیگ ادا نہیں کرتی، انگلش کھلاڑی پاکستان کے ساتھ شیڈول سیریز کیلئے آئی پی ایل چھوڑ رہے ہیں تو بورڈز اور کھلاڑیوں پر جرمانہ کیا جانا چاہیے۔،،
واضح رہے کہ آئی پی ایل میں شریک انگلینڈ کے ٹاپ کرکٹرز جونی بیرسٹو، سیم کرن، لیام لیونگسٹون، ول جیکس، ریس ٹوپلی، جوس بٹلر، فل سالٹ اور معین علی پاکستان کیخلاف سیریز کے باعث آئی پی ایل کو بیچ میں ہی چھوڑ کر اپنے ملک کی نمائندگی کیلئے وطن روانہ ہوگئے ہیں۔ 
شیڈول کے مطابق پاکستان اور انگلینڈ کے درمیان 4 ٹی 20 میچز پر مشتمل سیریز کا آغاز 22 مئی سے ہوگا جبکہ آئی پی ایل کے پلے آف سمیت فائنل بھی اسی دوران کھیلے جائیں گے جس میں غیرملکی کرکٹرز کی بڑی تعداد شامل نہیں ہوگی۔ 
غور طلب بات یہ ہے کہ انڈین پریمئیر لیگ (آئی پی ایل) کے آغاز سے قبل بھارتی ٹیم نے آخری ٹی20 ورلڈکپ جیتا تھا، اس کے بعد سے وہ کوئی ٹرافی جیتنے میں کامیاب نہیں ہوسکی ہے۔