پشاور زلمی نے اسلام آباد یونائیٹڈ 6 وکٹوں سے شکست دیدی

کراچی: پی ایس ایل کے دسویں میچ میں اسلام آباد یونائیٹڈ نے پشاور زلمی کو جیت کے لیے 119 رنز کا ہدف دیا ہے۔

پاکستان سپر لیگ کے دسویں میچ میں پشاور زلمی نے اسلام آباد یونائیٹڈ کے خلاف ٹاس جیت کر پہلے فیلڈنگ کا فیصلہ کیا اور اسلام آباد کے خلاف جارحانہ حکمت عملی اپنائی جس کے باعث اسلام آباد کی ٹیم اننگز کے آغاز سے ہی مشکلات کا شکار دکھائی دی، اوپنر پال اسٹرلنگ صرف ایک رن بناکر آؤٹ ہوگئے جب کہ ون ڈاؤن آنے والے فل سالٹ 9 اور فہیم اشرف صرف 2 رنز بناکر چلتے بنے، کپتان شاداب خان 6 رنز پر رن آؤٹ ہوگئے۔

اوپنر الیکس ہیلز نے پشاور کے بولرز کے خلاف مزاحمت کی اور 41 رنز بناکر آؤٹ ہوگئے، پشاور کی شاندار بولنگ کے آگے اسلام آباد کا کوئی بھی کھلاڑی زیادہ دیر وکٹ پر کھڑا نہ رہ سکا اور اسلام آباد کی پوری ٹیم 17.1اوورز میں 118 رنز بناکر آؤٹ ہوگئی۔

پشاور زلمی کی جانب سے وہاب ریاض نے اور ثاقب محمود نے شاندار بولنگ کا مظاہرہ کرتے ہوئے بالترتیب 4اور 3 کھلاڑیوں کو پویلین بھیجا جب کہ مجیب الرحمان اور عمید آصف نے ایک ایک وکٹ حاصل کی۔

ٹاس کے موقع پر اسلام آباد یونائیٹڈ کے کپتان شاداب خان کا کہنا تھا کہ آج ہم ٹرینڈ تبدیل کریں گے اور پہلے بیٹنگ کرتے ہوئے جیتیں گے۔

اسلام آباد یونائیٹڈ کی ٹیم میں 2 تبدیلیاں کی گئی ہیں، ظفر گوہر اور لوئس گریگری کی جگہ اسٹرلنگ اور فواد احمد کو شامل کیا گیا ہے جب کہ پشاور کی ٹیم میں محمد عرفان کی جگہ عمید آصف کو لیا گیا ہے۔