جب ٹیم کی کارکردگی بہتر نہ ہو تو کپتان پر الزام کیسا؟ جاوید میانداد

قومی ٹیم کے سابق ٹیسٹ کپتان جاوید میانداد نے کہا ہے کہ ایشیاء کپ کی غلطیوں کو دورکرنا ہوگا، جب ٹیم کی  کارکردگی بہتر نہ ہوتو کپتان کو کیسے مورد الزام ٹھہرایا جاسکتا ہے۔ 
میڈیا سے گفتگو کرتے ہوئے جاوید میاں داد نے کہا کہ اگر ٹیم کچھ نہیں کررہی تو کپتان پر تنقید کیا کریں، فیصلہ سازی کی مہارت تجربہ کے ساتھ ہی آتی ہے۔ پاکستانی کرکٹ ٹیم کو ایشیاء کپ میں جس طرح ناکامی اٹھانی پڑی وہ ایسی ٹیم نہیں ہے۔ بھارت کے ہاتھوں عبرتناک شکست اور ایونٹ میں  ناکامی کی وجہ بننے والی غلطیوں سے سبق سیکھنے کی ضرورت ہے۔ 
انہوں نے کہا کہ کرکٹ کی روح کو سمجھنا  ضروری ہے، بیٹرز کے نمبرزغیر ضروری طور پر نہ تبدیل کیے جائیں، ہر بیٹسمین کو پتہ ہے کہ فاسٹ بولر یا اسپنر کیا کرسکتا ہے، اسے پتہ ہونا چاہیے کہ حریف بولر کا سامنا کیسے کرنا ہے، کھلاڑی کو خود کو ہر کنڈیشن کے مطابق ہم آہنگ کرنا ہوتا ہے۔ 
جاوید میانداد نے کہا کہ بھارت میں ہونے والے ورلڈ کپ میں کھیل پر بھرپور توجہ دینا ہوگی، بطور پروفیشنل  کھلاڑی تماشائیوں کے دباؤ میں آئے بغیر کھیلنے کی کوشش کی جائے، بھارت میں بھی ویسی ہی کرکٹ ہوگی جیسی پوری دنیا میں کھیلی جاتی ہے۔ ممکنہ وکٹوں اور مقابلوں کو مد نظر رکھ کر مشقوں پر توجہ دی جائے تو ٹیم کے لیے بہتر ہوگا۔