جارحانہ اپروچ کے ساتھ کرکٹ کھیلیں گے، ہیڈکوچ قومی ٹیم

قومی ٹیم کے ہیڈکوچ گرانٹ بریڈ برن کا کہنا ہے کہ ورلڈ کپ کے لیے پلینگ الیون کی سلیکشن مشکل ضرور ہے لیکن کمبینیشن کے حوالے سے ہمارے تمام تصورات کلئیر ہیں۔  
لاہور میں قومی ٹیم کے تربیتی کیمپ کے دوران میڈیا سے بات چیت کرتے ہوئے قومی ٹیم کے ہیڈکوچ گرانٹ بریڈ برن کا کہنا تھا کہ ایشیاکپ میں سری لنکن کنڈیشنز میں جارحانہ کرکٹ کی اپروچ کے ساتھ کھلینا پڑے گا۔ 
افغانستان کے خلاف سیریز اور ایشیاکپ کی تیاریوں کے حوالے سے سوالات کے جواب دیتے ہوئے انہوں نے موقف اختیار کیا کہ مڈل اوررز میں رنز بنانے اور حریف کے رنز روکنے پر کام کررہے ہیں، افغان ٹیم کے خلاف پہلا میچ انتہائی اہم ہوگا۔ 
قومی ٹیم کے ہیڈکوچ نے کہا کہ ٹیم ڈائریکٹرمکی آرتھر کے ساتھ مسلسل رابطہ میں ہوں، ان کی عدم موجودگی سے کوئی مشکل نہیں، ہم مشاورت کے ساتھ اچھی پلاننگ کے ہمراہ میدان میں اتریں گے، مکی آرتھر 23 اگست کو سری لنکا میں ٹیم کو جوائن کریں گے اور ایشیاکپ میں بھارت کے خلاف میچ کے بعد وہ واپس چلے جائیں گے تاہم ورلڈکپ اور دورہ آسٹریلیا میں ٹیم کے ہمراہ ہوں گے۔ 
انہوں نے کہا کہ پلینگ الیون کی سلیکشن مشکل ضرور ہوتی ہے لیکن ہمارے ذہن میں ہے کہ کس کمبینیشن کے ساتھ کس میچ میں کھیلنا ہے، 
ہمیں ایک اچھے فاسٹ بولر کم آل راونڈر کی تلاش تھی، فہیم اشرف کی واپسی سے امید ہے کہ وہ ٹیم کی کامیابی میں کردار ادا کریں گے۔ 
گرانٹ بریڈ برن نے مزید کہا کہ شاداب خان، محمد نواز اور افتخار احمد کو بھی اعتماد دینے کی ضرورت ہے۔