انگلش کرکٹر جیسن رائے، پاکستان سپر لیگ کے جاری نویں ایڈیشن میں کوئٹہ گلیڈی ایٹرز کے لیے کھیل رہے ہیں۔
١٢ مارچ ٢٠٢٤
انگلینڈ کے کرکٹر جیسن رائے نے انڈین پریمیئر لیگ (آئی پی ایل) 2024 سے دستبرداری کے اپنے فیصلے کی وجہ بتا دی۔
آئی پی ایل کے 17 ویں ایڈیشن میں کولکتہ نائٹ رائیڈرز کی نمائندگی کرنے والے جیسن رائے نے اپنی کچھ ذاتی وجوہات کا حوالہ دیتے ہوئے اپنے موقف کا اظہار کر دیا ہے۔ یہ پہلا موقع نہیں ہے جب جیسن رائے نے ایسا فیصلہ کیا ہو۔ اس سے قبل وہ گجرات ٹائٹنز کے ساتھ آئی پی ایل 2022 کے لیے اور دہلی کیپٹلزکی طرف سے کھیلتے ہوئے آئی پی ایل 2020 سے دستبردار ہو گئے تھے۔
اچانک 2020 میں آئی پی ایل چھوڑنے کے بارے میں انہوں نے اپنی دستبرداری کے لیے ذاتی وجوہات کا حوالہ دیا، جب کہ 2022 میں، انہوں نے کھیل سے "غیر معینہ مدت کے لیے وقفہ" لیا۔
جیسن رائے نے کولکتہ نائٹ رائیڈرز کی طرف سے جاری کردہ ایک بیان میں وضاحت کی کہ انہیں اپنے خاندان کے ساتھ وقت گزارنے کے لیے آئی پی ایل کو چھوڑنے کا مشکل انتخاب کرنا پڑا۔
اپنی غیر موجودگی کے باوجود، جیسن رائے نے کولکتہ نائٹ رائیڈرز کے لیے اپنی حمایت کا اظہار کیا اور ٹورنامنٹ مٰں کامیابی کے لیے ٹیم کولکتہ کے لیے نیک خواہشات کا اظہار کیا۔
رائے نے کہا کہ “بہت غور و فکر کے بعد، میں نے اس سال کے آئی پی ایل سے محروم ہونے کا سخت فیصلہ کیا ہے۔ جنوری کے آغاز سے گھر سے دور رہنے کے بعد مجھے اپنے خاندان کے پاس واپس جانے کی ضرورت ہے اور آنے والے ایک بہت مصروف سال سے پہلے تازہ دم ہونا ہے۔ میں پورے ٹورنامنٹ میں کولکتہ میں اپنے دوستوں اور ساتھیوں کی حمایت کروں گا اور ان کے لیے نیک خواہشات کا اظہار کروں گا۔"
دوسری جانب کولکتہ نائٹ رائیڈرز نے بھی رائے کی جگہ، انگلینڈ کے ہی جیسن رائے کے ساتھی کرکٹر فل سالٹ کی شمولیت کا اعلان کیا، جو آئی پی ایل 2023 میں دہلی کیپٹلز کے ساتھ شاندار کارکردگی کے باوجود آئی پی ایل 2024 میں فروخت نہیں ہوئے تھے۔ کولکتہ نائٹ رائیڈرز نے فل سالٹ کو 1.5 کروڑ کی ریزرو قیمت پر حاصل کیاہے۔
