نیوزی لینڈکی ناقص کارکردگی، کین ولیمسن ٹیم کی قیادت سے دستبردار

بلیک کیپس کے تینوں فارمیٹس کے کپتان کین ولیمسن نے ٹی 20 ورلڈ کپ میں نیوزی لینڈ کی انتہائی بری پرفارمنس کے باعث وائٹ بال ٹیم کی قیادت سے علیڈگی کا اعلان کیا ہے، ولیمسن ڈومیسٹک کرکٹ کھیلنے سے انکار کرتے ہوئے سینٹرل کنڑیکٹ سے بھی دستبردار ہوگئے ہیں۔ 
نیوزی لینڈ کے لیے سب سے زیادہ ٹیسٹ رنز بنانے والے 33 سالہ کین ولیمسن نے موسم گرما میں ملکی ڈومیسٹک کرکٹ کے بجائے بین الاقوامی کرکٹ کو ترجیح دینے کا فیصلہ کیا ہے۔ 
واضح رہے کہ نیوزی لینڈ کے سینٹرل کنٹریکٹ یافتہ کھلاڑیوں کے لیے لازم ہے کہ وہ بین الاقوامی کرکٹ کے علاوہ ملک کی ’سپر اسمیش ٹی 20 لیگ‘ میں بھی ایکشن میں نظر آئیں گے۔  
نیوزی لینڈ کرکٹ بورڈ نے سپر اسمیش ٹی 20 لیگ جنوری میں کرانے کی منصوبہ بندی کی ہے جبکہ کین ولیمسن نے اپنے اس فیصلے کے دفاع میں کہا کہ بلیک کیپس کے لیے کھیلنا میرے لیے اعزاز کی بات ہے لیکن میں فی الحال بین الاقوامی مقابلوں میں نیوزی لینڈ ٹیم کے لیے اپنا حصہ ڈالنا چاہتا ہوں۔،، 
دوسری جانب این زیڈ سی نے اپنے ایک بیان میں کہا کہ ولیمسن مستقبل قریب میں سینٹرل کنٹریکٹ قبول کر سکتے ہیں۔ 
نیوزی لینڈ کرکٹ کے چیف ایگزیکٹو اسکاٹ ویننگ کا کہنا تھا کہ کین ولیمسن کا فیصلہ بورڈ کے قوانین سے متصادم ضرور ہے مگر ہم نیوزی لینڈ کے اب تک کے سب سے بڑے بلے باز کو رعایت دیتے ہوئے خوشی محسوس کرتے ہیں۔،، 
نیوزی لینڈ کی ٹیم رواں سال دسمبر میں انگلینڈ کے خلاف تین ٹیسٹ میچز کی سیریز میں حصہ لے گی۔ 
بلیک کیپس کی ٹیم نے 2014  سے ٹی 20 یا 50 اوورز کے ورلڈ کپس کے سیمی فائنل تک رسائی حاصل کی تھی، یہ پہلا موقع ہے کہ ناقص کارکردگی کی وجہ سے ٹیم ٹی 20 ورلڈ کپ 2024 کے پہلے مرحلے میں ہی میگا ایونٹ سے باہر ہوگئی ہے۔