ٹیم انڈیا میں روہت شرمااور ویرات کوہلی کی جگہ کوئی نہیں لے سکتا، کپل دیو

ٹیم انڈیا کے سابق ورلڈ کپ فاتح کپتان کپل دیو نے کہا ہے کہ ویرات کوہلی اور روہت شرما کی تجربہ کار جوڑی کی کمی تمام فارمیٹس میں ہندوستانی ٹیم کے لئے ناقابل تلافی ہے اور ان دونوں کھلاڑیوں کا مرتبہ بھی سچن ٹنڈولکر اور ایم ایس دھونی کے برابر ہے، انہوں نے ہندوستانی ٹیم کی بڑی خدمت کی ہے۔ 
کپل دیو، جو پی جی ٹی آئی کے صدر بھی ہیں، نے ٹرینٹی گالف چیمپئن شپ لیگ کے دوسرے ایڈیشن کی نقاب کشائی کی تقریب سے خطاب کرتے ہوئے کہاکہ ’’کوئی بھی کسی بھی فارمیٹ میں ہندوستانی ٹیم میں ویرات اور روہت کی جگہ نہیں لے سکتا۔ یہ ان کے لئے خوشگوار رخصت ہے۔ ویرات نے تمام فارمیٹس میں اپنا جو مقام بنایا ہے، یقینی طور پر ٹی20 میں اس کی کمی محسوس کی جائے گی۔ یہ دونوں سچن ٹنڈولکر اور ایم ایس دھونی کے برابر ہیں۔ دونوں کی کمی ناقابل تلافی ہے۔‘‘ 
خیال رہے کہ ویرات کوہلی نے ٹی20 ورلڈ کپ کے فائنل میں جنوبی افریقہ کے خلاف بھارت کی سنسنی خیز جیت میں 76 رنز کی میچ وننگ اننگز کھیلنے کے بعد ٹی20 انٹرنیشنل کرکٹ سے ریٹائرمنٹ کا اعلان کیا تھا۔ بعد میں، پریس کانفرنس کے دوران روہت شرما نے بھی اپنے ٹی20 کیریئر کو الوداع کہہ دیا تھا۔  
یاد رہے کہ ویرات کوہلی کا ٹی 20 انٹرنیشنل کا سفر جون 2010 میں شروع ہوا تھا۔ 14 برسوں میں انہوں نے 125 ٹی20 میچوں میں 4188 رنز بنائے، جس میں ایک سنچری اور 38 نصف سنچریاں شامل ہیں۔ کھیل کے لیے ان کی انتھک لگن اور جذبے نے انہیں ٹی20 فارمیٹ میں روہت شرما کے بعد دوسرا سب سے زیادہ رنز بنانے والا کھلاڑی بنا دیا، جن کی ریٹائرمنٹ ایک شاندار ٹی 20 کیریئر کے خاتمے کی علامت ہے، جس کے دوران وہ 159 میچوں میں 4231 رنز کے ساتھ فارمیٹ کے سب سے زیادہ اسکورر بن گئے۔ دوسری جانب بھارتی ٹیم کے ورلڈ کپ فاتح کپتان روہت شرما کے نام ٹی 20 انٹرنیشنل میں سب سے زیادہ سنچریاں بنانے کا ریکارڈ بھی درج ہے۔