کراچی کے مہاجروں کا مجھ پر بہت احسان ہے، شعیب اختر کا اعتراف

قومی کرکٹ ٹیم کے سابق فاسٹ بولر شعیب اختر کا کہنا ہے کہ مہاجروں کا ان پر بہت احسان ہے، اگر میں کراچی کے لئے کچھ کرسکا تو جان حاضر کردوں گا۔

یوٹیوبر نادر علی کے پوڈ کاسٹ میں گفتگو کرتے ہوئے راولپنڈی ایکسپریس شعیب اختر نے کہا کہ مہمان نوازی میں سندھیوں کی کوئی مثال نہیں جبکہ پختون کھانے مجھے بے حد پسند ہیں، فاسٹ بولر نے کہا کہ میرے پیپلزپارٹی کے شریک چیرمین آصف زرداری کے ساتھ قریبی تعلقات ہیں۔

انہوں نے کہا کہ کرکٹ کھیلنے کیلئے کراچی آتا تھا تو دوستوں نے خوب مہمان نوازی کی، کراچی کے تقریباً ہر علاقے میں کھیلا ہوں اور جب حالات خراب ہوتے تھے تو میرے دوست مجھے لے کر آتے اور چھوڑنے جاتے تھے۔

شعیب اختر نے اعتراف کیا کہ کراچی کے مہاجروں کا ان پر بہت احسان ہے، اگر میں کراچی کے لئے کچھ کرسکا تو جان حاضر کردوں گا۔ پنجاب میں ٹیلنٹ موجود ہے لیکن کراچی میں پروفشنل مینیجنگ نوجوان ہیں، وہی ٹیلنٹ کو مینج کرسکتے ہیں، اگر ملک میں دونوں ملکر ساتھ چلیں تو پاکستان کو ترقی کرنے سے کوئی نہیں روک سکتا۔

انہوں نے کہا کہ کراچی میں ناظم آباد، لالو کھیت، 10 نمبر، سہراب گوٹھ اور الکرم اسکوائر جیسے علاقوں میں رہا ہوں، جہاں دوستوں نے مجھے اردو سکھائی۔