کیا میلبرن اسٹارز، کراچی کنگز اور ممبئی انڈینز کی ٹیمیں ایک دوسرے کے مدمقابل آسکتی ہیں؟
٠٣ اپریل ٢٠٢٤
دس سال بعد ایک مرتبہ پھر چیمپئینز لیگ ٹی20 کرکٹ کو بحال کرنے کی تیاریاں ہونے لگیں۔
میڈیا رپورٹس کے مطابق سال 2014 میں آخری بار چیمپئینز لیگ ٹی20ٹورنامنٹ کا انعقاد بھارت میں ہوا تھا، جس میں چنئی سپر کنگز نے بنگلورو میں فائنل میں کولکتہ نائٹ رائیڈرز کو شکست دے کر ٹائٹل جیتا تھا۔ اس ایڈیشن میں ہندوستان کی تین، آسٹریلیا اور جنوبی افریقہ کی 2،2 جبکہ پاکستان، ویسٹ انڈیز اور نیوزی لینڈ کی ایک، ایک ٹیمیں شامل تھیں۔
چیمپئنز لیگ ٹی20 کرکٹ کو بحال کرنے کیلئے بھارت، آسٹریلیا اور انگلینڈ کے کرکٹ بورڈز نے رابطے تیز کردیئے ہیں۔
کرکٹ وکٹوریہ کے سی ای او نک کمنز کا کہنا ہے کہ تینوں بورڈز کے درمیان بات چیت جاری ہے تاہم ٹورنامنٹ کیلئے ونڈو تلاش کرنے میں مشکل پیش آرہی ہے۔ میرے خیال میں چیمپیئنز لیگ کا (پہلے ایڈیشن) اپنے وقت سے پہلے ہوگیا تھا کیونکہ اس وقت منظر نامہ پختہ نہیں تھا تاہم یہ صحیح وقت ہے۔
انہوں نے کہا کہ آئی سی سی ٹورنامنٹس کے علاوہ سیریز اور فرنچائز لیگ بھی ہونی ہیں جس کے باعث ہمیں مشکلات درپیش ہیں، چیمپئینز لیگ ٹی20 کیلئے کرکٹ آسٹریلیا کے سی ای او نک ہاکلے کے ساتھ باقاعدہ بات چیت کررہے ہیں تاہم جے شاہ سے ملاقات کے بعد کوئی حتمی فیصلہ کریں گے۔
نک کمنز نے کہا کہ “ہم ابھی تک یہ نہیں جان سکے کہ کون سی لیگ بہترین ہے۔ آئی پی ایل، پی ایس ایل یا بگ بیش؟
ہم صرف ایک ہی طریقے سے جانچ سکتے ہیں اور وہ یہ ہے کہ میلبرن اسٹارز کی ٹیم کراچی کنگز یا ممبئی انڈینز کے ساتھ کھیلے۔،،
