کراچی ٹیسٹ: کپتان بابر کی سنچری کے بعد سرفراز کی نصف سنچری

نیوزی لینڈ کے خلاف دو ٹیسٹ میچوں پر مشتمل سیریز کے پہلے میچ میں پاکستان کا ٹاپ آرڈر ایک بار پھر ناکام ہوا اور 48 رنز پر 3 وکٹیں گر چکی تھیں۔ پہلے سیشن میں قومی ٹیم کی چار وکیٹں گر چکی تھیں جب 110 کے مجموعی اسکور پر سعود شکیل بھی 22 رنز بنا کر آؤٹ ہوگئے تھے۔

اس موقع پر کریز پر موجود کپتان بابر اعظم کا ساتھ دینے 3 سال بعد ٹیسٹ ٹیم میں واپسی کرنے والے سابق کپتان سرفراز احمد آئے اور دونوں مل کر ٹیم کی ڈوبتی نیا کو پار لگانے کی کوششوں میں مصروف ہوگئے۔

اس دوران کپتان بابر اعظم نے سنچری اسکور کی اور ان کا بھرپور ساتھ دینے والے سابق کپتان سرفراز احمد نے نصف سنچری اسکور کرلی۔ بابر کی یہ ٹیسٹ کیریئر کی نویں سنچری ہے۔

سرفراز احمد نے تین سال بعد ٹیم میں شاندار کم بیک کیا ہے اور انہوں نے اپنے کیریئر کے 50 ویں ٹیسٹ میچ میں 19ویں نصف سنچری اسکور کی ہے۔ انہوں نے 2 سنچریاں بھی بنا رکھی ہیں۔

بابر اعظم 150 اور سرفراز احمد 54 رنز پر کھیل رہے ہیں۔ پاکستان کا مجموعی اسکور 4 وکٹوں کے نقصان پر 240 رنز ہے اور دونوں بلے بازوں کے درمیان 140 رنز کی قیمتی پارٹنر شپ قائم ہوچکی ہے۔

اس سے قبل اوپنر امام الحق نے 24، سعود شکیل نے 22 رنز بنائے۔ عبداللہ شفیق اور شان مسعود مکمل ناکام رہے اور بالترتیب 7 اور 3 رنز بنا کر پویلین لوٹ گئے۔

نیوزی لینڈ کی جانب سے بریسویل نے 2 جب کہ کپتان ساؤتھی اور پٹیل نے ایک ایک وکٹ لی۔

آج کے میچ میں قومی ٹیم میں تین تبدیلیاں کی گئی ہیں۔ امام الحق جو ان فٹ ہونے کے باعث انگلینڈ کے خلاف آخری میچ سے باہر ہوگئے تھے وہ فٹ ہوکر ٹیم میں واپس آئے ہیں۔ اس کے علاوہ سرفراز احمد اور میر حمزہ کی بھی ٹیم میں واپسی ہوئی ہے۔

عبداللہ شفیق، شان مسعود، سعود شکیل، آغا سلمان، نعمان علی، محمد وسیم جونیئر اور ابرار احمد بھی پلیئنگ الیون میں شامل ہیں۔