ٹی 20 ورلڈکپ 2024 میں متعدد اہم ریکارڈ ٹوٹ گئے

امریکا اور ویسٹ انڈیز کی مشترکہ میزبانی میں کھیلا گیا آئی سی سی ٹی 20 ورلڈ کپ 2024 بھارت کے چیمپئن بننے کے ساتھ اختتام پذیر ہوگیا تاہم میگا ایونٹ میں کئی نئے ریکارڈ بھی بنے۔ فائنل ٹاکرے میں ہندوستان کے مجموعی اسکور 176/7 نے ٹی 20 ورلڈ کپ فائنلز کے تمام پچھلے اسکور کو پیچھے چھوڑ دیا۔ 
کرکٹ کی تاریخ میں پہلی بار آئی سی سی ٹورنامنٹ امریکا میں بھی منعقد ہوا اور ٹی 20 ورلڈ کپ 2024 کی میزبانی امریکا نے ویسٹ انڈیز کے ساتھ مشترکہ طور پر کی۔ تقریباً ایک ماہ تک جاری رہنے والا میگا ایونٹ بھارت کے دوسری بار عالمی چیمپئن بننے کے ساتھ اختتام پذیر ہوگیا لیکن میگا ایونٹ میں کھلاڑیوں کی یادگار پرفارمنس اور کئی نئے ریکارڈز بھی قائم ہوئے۔ 
آسٹریلیا کے پیٹ کمنز نے کسی بھی میگا ایونٹ میں بیک ٹو بیک ہیٹ ٹرک کرنے والے پہلے بولر کا اعزاز حاصل کیا جنہوں نے پہلے بنگلہ دیش اور پھر اگلے میچ میں افغانستان کے خلاف مسلسل تین گیندوں پر تین بلے بازوں کی وکٹیں اڑائیں۔ تاہم اس کے ساتھ ہی کسی بھی میگا ایونٹ میں ایک ہی روز میں دو ہیٹ ٹرکس بننے کا ریکارڈ بھی قائم ہوا۔ جس روز پیٹ کمنز نے افغانستان کے خلاف ہیٹ ٹرک کی، اسی روز ورلڈ کپ کے دوسرے میچ میں انگلینڈ کے کرس جارڈن نے امریکی بلے بازون کی وکٹیں اڑا کر یہ کارنامہ انجام دیا۔ 
ورلڈ کپ کی تاریخ میں پہلی بار کسی بولر نے اپنے کوٹے کے چاروں اوورز میڈن کرائے۔ نیوزی لینڈ کے لوکی فرگوسن نے پاپوا نیوگنی کے خلاف 24 کی 24 ڈاٹ بالز کرائیں اور ایک بھی رن نہ دینے کے ساتھ تین بلے بازوں کو بھی آؤٹ کیا جو کہ اپنے آپ میں ایک ریکارڈ ہے۔ 
ٹی 20 ورلڈ کپ 2024 میں افغانستان نے اپنی کارکردگی سے سب کو حیران کیا۔ کرکٹ کی سپر پاور آسٹریلیا اور نیوزی لینڈ جیسی ٹیموں کو شکست دے کر پہلی بار کسی ٹورنامنٹ کے سیمی فائنل کے لیے کوالیفائی کیا۔ میگا ایونٹ میں افغان اوپنر رحمان اللہ گرباز 281 رنز بنا کر سر فہرست رہے جب کہ بولنگ میں بھی افغانستان کے فضل حق فاروقی، بھارت کے رشدیپ سنگھ کے ہمراہ 17 وکٹوں کے ساتھ سب سے اوپر ہیں۔ 
اسی میگا ایونٹ میں افغان ٹیم کے کپتان راشد خان 100 سے کم میچز میں 150 وکٹیں لینے کا سنگ میل عبور کرنے والے پہلے بولر بن گئے۔ 
فضل حق فاروق نے صرف 9 رنز کے عوض حریف ٹیم کے پانچ بلے بازوں کا شکار کر کے اننگز میں بہترین بولنگ کا ریکارڈ اپنے نام کیا۔ 
ٹی 20 ورلڈ کپ 2024 کی فاتح ٹیم بھارت کے کپتان روہت شرما نے 19 گیندوں پر تیز ترین نصف سنچری کا ریکارڈ بنایا۔ اس کے ساتھ ہی ٹی 20 میں 200 چھکے لگانے والے پہلے بیٹر بننے کا اعزاز بھی پایا۔ 
انگلش ٹیم میگا ایونٹ میں اپنے اعزاز کا دفاع تو نہ کر پائی مگر انگلینڈ کے کپتان جوس بٹلر نے امریکا کے خلاف ایک ہی اوور میں پانچ چھکے ضرور لگائے۔ 
میگا ایونٹ میں سب سے بڑی انفرادی اننگز کا ریکارڈ ویسٹ انڈیز کے نکولس پوران کے پاس رہا جو افغانستان کے خلاف 98 رنز کی اننگز کھیلنے میں کامیاب رہے۔ 
ٹی 20 ورلڈ کپ 2024 میں شاندار کیچز پکڑنے کا سلسلہ بھی جاری رہا۔ بھارت کے فیلڈر اکشر پٹیل کا سپر ایٹ مرحلے میں مچل مارش کے کیچ کو ٹورنامنٹ کا بہترین کیچ بھی قرار دیا جا رہا ہے۔ 
میگا ایونٹ میں انگلینڈ اور اومان کا مختصر ترین میچ ہوا۔ اومان کی ٹیم 47 رنز پر ڈھیر ہوئی تو انگلش ٹیم نے مطلوبہ ہدف 3.1 اوورز میں حاصل کر لیا جب کہ اسی ٹورنامنٹ میں جنوبی افریقہ اور افغانستان کے درمیان کھیلا گیا سیمی فائنل بھی ٹی 20 ورلڈ کپ کی 17 سالہ تاریخ کا سب سے مختصر سیمی فائنل رہا جس میں میچ کا فیصلہ مجموعی طور پر 20 اوورز پورے کھیلے بغیر ہی ہوگیا۔