ویرات کوہلی نے ٹنڈولکرکا ریکارڈ توڑ دیا، سرڈان بریڈمین کے برابرپہنچ گئے

ویرات کوہلی نے ٹیسٹ سنچریوں کا سچن تیندولکر کا ریکارڈ توڑدیا، سرڈان بریڈمین کے ریکارڈ کی برابر پہنچ گئے۔ 
بھارت اور ویسٹ انڈیز کے درمیان دوسرے ٹیسٹ کا دوسرا دن ویرات کوہلی کے ریکارڈز کے نام رہا۔ کوہلی نے ٹیسٹ سنچریوں کے آل ٹائم عظیم بلے باز سر ڈان بریڈمین کے ریکارڈ کی برابری کی۔ وہ اپنے 500ویں بین الاقوامی میچ میں سنچری بنانے والے پہلے بھارتی بلے باز بن گئے اور76 بین الاقوامی سنچریاں بنانے والے تیز ترین کھلاڑی بھی بن گئے۔ انہوں نے سچن ٹنڈولکر کو پیچھے چھوڑ دیا۔ ویرات کوہلی نے پورٹ آف اسپین میں بلے بازی کے دوران 206 گیندوں پر121 رنز کی شاندار اننگز کھیلی۔ ان کی اننگز کی بدولت بھارتی ٹیم نے 400 رنز کا ہندسہ عبور کیا اور ویسٹ انڈیز پر اپنی گرفت مضبوط کی۔ 
کوہلی اپنے کیریئر کے 500ویں میچ میں سب سے زیادہ رنز بنانے والے کھلاڑی بن گئے۔ انہوں نے 121 رنز کی اننگز کھیلی۔ یہی نہیں بلکہ کوہلی اپنے 500ویں میچ میں سنچری بنانے والے پہلے کھلاڑی بن گئے۔ ان سے پہلے کوئی کھلاڑی اپنے 500ویں میچ میں نصف سنچری بھی نہیں بنا سکا۔ کوہلی کے بعد کمارا سنگاکارا نے 500ویں میچ میں 48 رنز بنارکھے ہیں۔ سری لنکا کے بلے باز نے یہ اننگز مارچ 2013 میں بنگلہ دیش کے خلاف ایک ون ڈے میں کھیلی تھی۔
ویرات کوہلی 500 بین الاقوامی میچوں میں سب سے زیادہ سنچریاں بنانے والے بلے باز بن گئے۔ انہوں نے لیجنڈری سچن ٹنڈولکرکا ریکارڈ توڑ دیا۔ کوہلی نے 76 سنچریاں بنائیں جبکہ ٹنڈولکر نے 500 میچوں میں 75 سنچریاں اسکور کیں۔ بین الاقوامی کرکٹ میں ویرات سے زیادہ سنچریاں (100 سنچریاں) صرف ٹنڈولکرنے بنائی ہیں۔ اس کے لیے انہوں نے 664 بین الاقوامی میچ کھیلے۔
ویرات کوہلی نے ویسٹ انڈیز کے خلاف سنچری بنانے کے معاملے میں بھی ایک ریکارڈ بنایا۔ ویرات نے ویسٹ انڈیز کے خلاف اپنی 12ویں سنچری بنائی اور جنوبی افریقہ کے عظیم آل راؤنڈر جیک کیلس کی برابری کی۔ بین الاقوامی کرکٹ میں ویسٹ انڈیز کے خلاف سب سے زیادہ سنچریاں بنانے کا ریکارڈ سنیل گواسکر کے پاس ہے۔ گواسکر نے ویسٹ انڈیز کے خلاف 13 سنچریاں اسکور کررکھی ہیں۔ 
کوہلی اپنی اس شاندار اننزگ کے باعث آسٹریلیا کےعظیم بلے باز سرڈان بریڈمین کے برابر پہنچ گئے ہیں۔ انہوں نے مذکورہ میچ میں اپنی 29ویں سنچری بنائی جبکہ سرڈان بریڈمین نے 52 ٹیسٹ میچز میں 29 سنچریاں بنائیں۔ سب سے زیادہ ٹیسٹ سنچریوں کے معاملے میں ویرات 16ویں نمبر اور بھارتی بلے بازوں میں چوتھے نمبر پر ہیں۔
بھارتی کھلاڑیوں میں ویرات سے زیادہ ٹیسٹ سنچریاں صرف سچن ٹنڈولکر(51 سنچریاں)، راہول ڈریوڈنے36 سنچریاں اور سنیل گواسکرنے 34 سنچریاں بنائی ہیں۔