ایشیاء کپ: ویرات کوہلی کونمبر 4 پر کھلانا چاہیے، روی شاستری

بھارتی ٹیم کے سابق کوچ روی شاستری نے آنے والے میگا ٹورنامنٹس سے قبل بلیوشرٹس کے لیے چوتھے نمبر پر بیٹنگ کے مسئلے کا حل تجویز کیا ہے۔ ایک انٹرویو میں روی شاستری نے کہا کہ ویرات کوہلی کو اس اہم کردار میں تعینات کرنے سے ممکنہ طور پر بھارتی ٹیم کا دیرینہ مسئلہ حل ہو سکتا ہے۔ 
سابق ٹیسٹ کرکٹر نے مزید کہا کہ ویرات کوہلی نے ریکارڈز کے مطابق چوتھے نمبر پر بیٹنگ کرتے ہوئے اچھی کارکردگی کا مظاہرہ کیا ہے اور اس اقدام سے قومی ٹیم کو بہت زیادہ مدد مل سکتی ہے۔ روی شاستری کا کہنا تھا کہ "آپ جانتے ہیں کہ اگر ہم اوپر سے دو یا تین وکٹیں جلدی کھوئیں تو ہم ہار جاتے ہیں لیکن اگر آپ ویرات کوہلی کے ریکارڈ کو دیکھیں تو وہ چوتھے نمبر پر کافی اچھے ہیں۔ 
بھارتی ٹیم نے حالیہ دنوں میں مڈل آرڈر کی اہم جگہ کا مسئلہ حل کرنے کے لیے کئی بلے بازوں کے ساتھ تجربہ کیا ہے، پھر بھی انھیں اس پوزیشن کے لیے کوئی موزوں امیدوار نہیں مل سکا۔ 
اس ماہ کے شروع میں روہت شرما نے کہا تھا کہ نمبر چار کے لیے قابل اعتماد امیدوار تلاش کرنا بلیوشرٹس کے لیے گزشتہ چار یا پانچ سال میں ایک بڑاچیلنج رہا ہے۔
یہاں یہ بات قابل ذکر ہے کہ ویرات کوہلی نے 42 ون ڈے میچوں میں چوتھے نمبر پر بیٹنگ کرتے ہوئے 55.21 کی اوسط سے 1767 رنز بنائے جس میں 7 سنچریاں شامل ہیں۔ روہت شرما کی قیادت والی ٹیم اپنی ایشیا کپ 2023ء مہم کا آغاز 2 ستمبر کو پالیکیلے انٹرنیشنل کرکٹ اسٹیڈیم میں پاکستان کے خلاف میچ سے کرے گی۔