فرنچائز کے مذکورہ کمپنی سے معاہدے میں یہ بات واضح تھی کہ بابراعظم کی جرسی پر آپ کی کمپنی کا لوگو موجود نہیں ہوگا۔
٣١ جولائی ٢٠٢٣
لنکا پریمیئر لیگ میں بابر اعظم کی شرٹ سے جوئے کی کمپنی کا لوگو اڑا دیا گیا جبکہ نسیم شاہ اور محمد نواز کی شرٹس پر کمپنی کا لوگو موجود رہا۔
کولمبو اسٹرائیکرز سے معاہدہ کرتے ہوئے ہی بابر اعظم نے واضح کر دیا تھا کہ وہ ٹورنامنٹ کے دوران نام بدل کر جوا کروانے والی سیروگیٹ کمپنی کی تشہیر کرنے والی شرٹ استعمال نہیں کریں گے۔
فرنچائز نے بھی ان کے فیصلے کا احترام کیا، اتوار کے روز بابر اعظم لیگ کے پہلے میچ کے لیے میدان میں اترے تو شرٹ سے لوگو غائب تھا مگراسی میچ میں کولمبو اسٹرائیکرز کی ہی نمائندگی کرنے والے نسیم شاہ اور محمد نواز کی شرٹس پر لوگو موجود تھا۔
بابر اعظم کی جانب سے جوا کمپنی کی تشہیر سے انکار کی خبر 4 جولائی کو ’’ایکسپریس نیوز‘‘ میں ہی شائع ہوئی تھی۔
اس لیگ کے پہلے روز کھیلے گئے میچ کے دوران بابراعظم 8 گیندوں پر 7 رنز بنا کر آؤٹ ہو گئے مگرانہوں نے جو ٹیم یونیفارم پہنا اس میں سٹہ بازی کی کمپنی کا لوگو موجود نہیں تھا جبکہ باقی پوری ٹیم نے اس کمپنی کے لوگو والی یونیفارم پہنی۔
اس لیگ کے آغاز سے پہلے ہی بابر اعظم نے ٹیم مینجمنٹ کو اپنے اس فیصلے سے آگاہ کردیا تھا کہ وہ کبھی بھی ایسی یونیفارم نہیں پہنیں گے جس سے سٹے بازی کی تشہیر ہو۔
اس طرح بابر اعظم کے لئے خاص طور پر فرنچائز نے مذکورہ کمپنی سے معاہدہ کیا جس میں یہ بات واضح طور پر تحریر تھی کہ بابر اعظم کی جرسی پر آپ کی کمپنی کا لوگو موجود نہیں ہوگا۔
اس عمل پر اب ہر جگہ بابراعظم کی تعریفیں کی جا رہی ہیں۔
.jpg)
