لیجنڈری کرکٹر ظہیر عباس کی طبیعت میں بہتری آنے پر وینٹی لیٹر سے ہٹا دیا گیا

لندن: برطانیہ میں زیر علاج قومی کرکٹ ٹیم کے لیجنڈری کرکٹر ظہیر عباس کو طبیعت بہتر ہونے پر ڈاکٹرز نے وینٹی لیٹر سے ہٹا دیا۔

میڈیا رپورٹ کے مطابق ظہیر عباس برطانوی دارالحکومت لندن کے نجی اسپتال میں زیر علاج ہیں، ڈاکٹروں نے طبیعت میں بہتری آنے پر سابق کرکٹر کو وینٹی لیٹر سے ہٹا دیا تاہم وہ انتہائی نگہداشت وارڈ(آئی سی یو) میں رہیں گے۔

ایشن ڈان بریڈ مین کے نام سے مشہور اور آئی سی سی کے سابق صدر ظہیر عباس لندن آمد سے قبل دبئی میں کورونا کا شکار ہوئے تھے، جس کے بعد سے اُن کی طبیعت مسلسل خراب رہی اور گزشتہ دنوں اُن کی حالت تشویشناک ہوگئی تھی۔

لیجنڈری کرکٹر کے اہل خانہ نے مداحوں سے ظہیرعباس کی صحت یاب کیلئے دعاؤں کی بھی اپیل کی۔

خیال رہے کہ 74سالہ ظہیر عباس نے اپنے کیریئر میں 78 ٹیسٹ اور 62 ون ڈے میچز میں پاکستان کی نمائندگی کی، اس دوران انہوں نے کئی یادگار اننگز کھیلیں۔