میر حمزہ کاؤنٹی چیمپیئن شپ کھیلنےکے لیے واروکشائر میں شامل

پاکستان کے لئے 3 ٹیسٹ میچز کھیلنے والے بائیں ہاتھ کے فاسٹ بولر میر حمزہ انگلش کاؤنٹی کرکٹ کھیلنے کے لیے انگلینڈ پہنچ گئے، جہاں وہ پہلا میچ برمنگھم کے ایجبسٹن گراؤنڈ پر لنکا شائر کے خلاف کھیلیں گے۔ 
95 فرسٹ کلاس میچوں میں 22.40 کی اوسط سے 379 وکٹیں لینے والے فاسٹ بولر کا کہنا ہے کہ وہ انگلینڈ میں ایک بار پھر کاؤنٹی کرکٹ کھیلنے کے لئے بے حد پُرجوش ہیں۔ 
ابتداء میں میر حمزہ سے واروکشائر کاؤنٹی نے 3 میچوں کے لئے معاہدہ کیا تھا۔ تاہم تاخیر سے ویزا ملنے کے باعث اب انہیں 2 میچ کھیلنے کو ملیں گے۔ 
میر حمزہ دوسرا میچ مڈل سسیکس کے خلاف کھیلیں گے۔ یہ بائیں ہاتھ کے پاکستانی فاسٹ بولر کا دوسرا انگلش سیزن ہے۔ اس سے قبل 2019ء میں سسیکس کے لئے انہوں نے 7 میچوں میں 24 وکٹیں اپنے نام کی تھیں۔ 
میرحمزہ کے پاس 379 فرسٹ کلاس وکٹوں کا شاندار ریکارڈ ہے، وہ اپنے ہم وطن حسن علی کی جگہ ٹیم میں شامل ہوں گے۔
واروکشائر کاؤنٹی نے پاکستان سپر لیگ میں کراچی کنگز کے لئے کھیلنے والے میر حمزہ کے علاوہ ٹیسٹ آل راونڈر حسن علی کے ساتھ بھی مختصر معاہدہ کیا ہے۔ 
حسن علی ان دنوں پاکستانی ٹیم کے ساتھ سری لنکا کے دورے پر ہیں جبکہ میر حمزہ خواہش رکھتے ہیں کہ واروکشائر کے لئےدونوں میچوں کے دوران بھرپور اور شاندار بولنگ کرکے اپنے ٹیم کو فتح سے ہمکنار کرائیں۔