مصباح الحق یو ایس ماسٹر ٹی 10 کا حصہ بن گئے

یو ایس ماسٹر ٹی 10 کے افتتاحی ایڈیشن کی تیاریاں تیزی سے جاری ہیں۔ پہلے ایڈیشن میں پاکستانی ٹیم کے سابق کپتان مصباح الحق بھی حصہ لیں گے جبکہ ان کے علاوہ کوری اینڈرسن، شیو نارائن چندر پال اور دیگر عالمی شہرت یافتہ کھلاڑی ایکشن میں نظر آئیں گے۔

ماسٹر ٹی 10 لیگ میں شرکت کے حوالے سے مصباح الحق کا کہنا تھا کہ امریکا میں خاص طور پر اس عمر میں اس فارمیٹ کا حصہ بننا ایک اعزاز کی بات ہے۔ ہر کوئی چاہتا ہے کہ پرانے کھلاڑی دوبارہ کھیلیں اور اس طرح یو ایس ماسٹرز ٹی 10 کامیاب ہوگا۔

لیگ میں 6 ٹیمیں نئے تیز ترین کرکٹ فارمیٹ میں حصہ لیں گی جبکہ یو ایس ماسٹر ٹی 10 کا نیا لوگو بھی جاری کر دیا گیا ہے۔ ٹی10 گلوبل اسپورٹس ابوظبی ٹی 10 کے منتظم اور امریکا میں قائم ایس اے ایم پی آرمی کرکٹ فرنچائز امریکی شہر ڈیلاس میں منعقدہ یو ایس ماسٹر ٹی 10 لیگ کے افتتاحی ایڈیشن میں شرکت کریں گی۔

ابوظبی ٹی 10 کے 6 اہم ایڈیشنز اور آئندہ انڈین ماسٹرز لیگ کے بعد ’’ٹی10 گلوبل اسپورٹس‘‘ امریکا میں یو ایس ماسٹرز ٹی 10 لیگ کے افتتاحی ایڈیشن کا اعلان کرتے ہوئے بہت خوش ہے۔

ان کا کہنا تھا کہ ٹی 10 کی بنیاد 2017 میں فٹ بال جیسے تیز رفتار کھیل کے فارمیٹ کو لانے کے لیے رکھی گئی تھی اور اب ہم 6 برس بعد امریکا میں ہیں۔ چونکہ یہ ایک تیز رفتار، متحرک اور ایکشن پر مبنی کھیل ہے اس لیے ہم نے سوچا کہ امریکا اس طرح کے فارمیٹ کے لیے بہترین مقام ہوگا۔