پی سی بی کے زیر اہتمام ملک بھر سے خواتین کرکٹرز کے ٹرائلز

پاکستان کرکٹ بورڈ کے زیر اہتمام خواتین کرکٹرز کے ٹرائلز کا آغاز ہوگیا۔
پاکستان کرکٹ بورڈ کے زیر اہتمام خواتین کرکٹرز کے ٹرائلز آج سے شروع ہوگئے ہیں۔ ترجمان پی سی بی کے مطابق پاکستان کرکٹ بورڈ ملک میں باصلاحیت خواتین کرکٹرز کی تلاش کی حکمت عملی کے تحت گراس روٹ لیول پر ٹرائلز کا انعقاد کررہا ہے۔ یہ ٹرائلز 23 سے 31 اگست تک 8 اکیڈمیز کے زیراہتمام منعقد ہوں گے۔ ترجمان نے مزید کہا کہ یہ ٹرائلز مختلف عمر کی خواتین کرکٹرز کو اپنی صلاحیتیں دکھانے اور آگے بڑھنے کا موقع فراہم کریں گے۔ 
ان ٹرائلز کی نگرانی قومی ویمنز سلیکشن کمیٹی کرے گی جس کے سربراہ سابق ٹیسٹ کرکٹر سلیم جعفر ہیں اور اس میں سابق انٹرنیشنل کرکٹرز مرینہ اقبال اور اسماویہ اقبال بھی شامل ہیں۔ یہ ٹرائلز تین کیٹگریز میں ہوں گے۔ انڈر 19 کھلاڑی کی پیدائش یکم ستمبر2004 یا اس کے بعد کی ہو وہ ایمرجنگ اور سینئر میں ہوں گے۔
ان ٹرائلز سے سلیکشن کمیٹی کو ٹیلنٹ تلاش کرنے اور پاکستان انڈر نائنٹین اور ایمرجنگ اسکواڈز کے سلیکشن میں مدد ملے گی۔ پاکستان ایمرجنگ ٹیم اکتوبر میں ویسٹ انڈیز ایمرجنگ اور پاکستان انڈر 19 ٹیم بنگلہ دیش میں جنوری 2024 میں انڈر 19 کے تین ملکی ٹورنامنٹ میں حصہ لے گی۔ ویمنز کرکٹ کی سربراہ تانیہ ملک کا کہنا ہے کہ ہم نے حال ہی میں پہلی مرتبہ 74 خواتین کرکٹرز کے لیے ڈومیسٹک کنٹریکٹس کا اعلان کیا ہے جس نے خواتین کرکٹ کے روشن مستقبل کے ضمن میں ایک شکل واضح کردی ہے۔ 
ملک گیر ٹرائلز کے ذریعے ہم نئی اورباصلاحیت کرکٹرز کو آگے لانے کے لیے کوشاں ہیں۔آنے والے دنوں میں خواتین کرکٹرز کے کئی ایونٹس ہیں اور ان ٹرائلز سے ہمیں بہترین ٹیلنٹ تلاش کرنے میں مدد ملے گی تاکہ سلیکٹرز انہیں قومی اسکواڈز کے لیے زیرغور لاسکیں۔ انہوں نے کہا کہ 8 اکیڈمیز کے خواتین کرکٹرز کے ٹرائلز23 اگست کو حنیف محمد ہائی پرفارمنس سینٹر کراچی،23 اگست کو ہی انضمام الحق ہائی پرفارمنس سینٹر ملتان،24 اگست کو ویمن اسپورٹس سینٹر بہاولپور،24 اگست کو کینئرڈ کالج فار ویمن لاہور،28 اگست کو پنڈی کرکٹ اسٹیڈیم، راولپنڈی، اسلام آباد ریجنز،29اگست کو قیوم اسٹیڈیم پشاور، 30 اگست کو ایبٹ آباد اسٹیڈیم اور31 اگست کو بگٹی اسٹیڈیم کوئٹہ میں منعقد ہوں گے۔