ایشین گیمز: نیپال نے ٹی20 کرکٹ کی تاریخ پلٹ کررکھ دی

ایشین گیمز میں کرکٹ کے زمرے میں نیپال نے منگولیا کے خلاف ہونے والے دلچسپ میچ میں ٹی20 کرکٹ کی تاریخ کا نیا ریکارڈ بناڈالا۔ 
ایشین گیمز کے کرکٹ ٹورنامنٹ میں ہونے والے مقابلوں کے دوران نیپال اور منگولیا کے درمیان میچ کھیلا گیا جس میں نیپال کی ٹیم نے ٹی20 کرکٹ میں نئی تاریخ رقم کرتے ہوئے سب سے بڑا اسکور، تیز ترین سنچری اور نصف سنچریاں بناڈالیں۔ 
انہوں نے منگولیا کے خلاف میچ کے دوران یہ کارنامہ سر انجام دیا، میچ میں نیپال نے اپنے 20 اوورز میں 3 وکٹوں کے نقصان پر 314 رنز بنائے، جو ٹی20 فارمیٹ کا سب سے بڑا اسکور ہے، اس سے قبل 2019 میں افغانستان نے آئرلینڈ کے خلاف 278 رنز کا مجموعہ کھڑا کیا تھا۔ 
نیپالی ٹیم کی اننگز میں مجموعی طور پر 26 چھکے مار کر افغان ٹیم نے آئرلینڈ کے خلاف 22 چھکوں کے ریکارڈ کو پاش پاش کردیا جبکہ ٹی20 فارمیٹ کی ایک اننگز میں سب سے زیادہ چھکے مارنے کا اعزاز بھی اپنے نام کرلیا۔ 
آل راؤنڈر دیپیندر سنگھ ایری نے ٹی20 فارمیٹ کی سب سے تیز نصف سینچری اسکور کی انہوں نے محض 9 گیندوں پر یہ کارنامہ سرانجام دیا جبکہ اس سے قبل بھارت کے یورواج سنگھ نے 12 گیندوں پر یہ اعزاز اپنے نام کیا تھا۔ 
ایری کی اننگز کا اختتام 10 گیندوں پر 52 رنز کے ساتھ ہوا جبکہ اس دوران انہوں نے 8 چھکے بھی لگائے جس میں ان کا اسٹرائیک ریٹ 520 کا رہا۔ 
تیز ترین سینچری بنانے والے کشال مالا نے صرف 34 گیندوں پر تیز ترین سنچری بنانے کے لیے بھارت کے روہت شرما اور جنوبی افریقہ کے ڈیوڈ ملر کو پیچھے چھوڑ دیا، مالا نے 50 گیندوں پر 8 چوکوں اور 12 چھکوں کی مدد سے 137 رنز بنائے۔

اس سے قبل روہت شرما اور ڈیوڈ ملر نے 35، 35 گیندوں پر سینچریاں اسکور کی تھیں۔ 
منگولیا کو جیت کیلئے بیس اوورز میں 315 رنز درکار تھے تاہم ان کی پوری ٹیم محض 41 رنز پر ڈھیر ہوگئی۔