بھارت میں کھیلے جانے والے دنیائے کرکٹ کے سب سے بڑے ایونٹ، ورلڈکپ 2023 کے باضابطہ مقابلوں میں پاکستان کا پہلا میچ نیدرلینڈز سےہوگا۔

بھارت میں رواں برس اکتوبر میں شیڈول 50 اوورز کے فارمیٹ پر مبنی ورلڈکپ میں پاکستان اپنا افتتاحی میچ جس ٹیم سے کھیلے گا اس کا فیصلہ ہوگیا۔

کرکٹ ورلڈکپ 2023 کوالیفائر میں نیدرلینڈز نے دلچسپ مقابلے کے بعد اسکاٹ لینڈ کو شکست دے دی اور ورلڈکپ 2023 کے لئے کوالیفائی کرلیا جس کے ساتھ ہی اسکاٹ لینڈ کی امیدوں پر پانی پھر گیا ہے اور وہ میگا ایونٹ کی دوڑ سے باہر ہوگئی ہے۔ میچ میں اسکاٹ لینڈ نے پہلے کھیلتے ہوئے مقررہ 50 اوورز میں 9 وکٹوں کے نقصان پر 277 رنز بنائے، نیدرلینڈز نے ہدف 6 وکٹوں کے نقصان پر 42.5 اوورز میں حاصل کرلیا۔

اس فتح کے ساتھ نیدرلینڈز ورلڈکپ میں پہنچ گیا ہے جہاں اس کا پہلا میچ پاکستان سے 6 اکتوبر بروز جمعہ حیدرآباد میں ہوگا۔

دوسری ٹیم جو ورلڈ کپ کیلئے کوالیفائی کرنے میں کامیاب ہوئی ہے وہ سری لنکا ہے جس کا پاکستان کے ساتھ میچ 12 اکتوبر بروز جمعرات حیدرآباد میں ہی ہوگا۔

پاکستان کا تیسرا میچ روایتی حریف بھارت سے 15 اکتوبر کو ہوگا جبکہ چوتھا میچ آسٹریلیا، پانچواں افغانستان، چھٹا جنوبی افریقہ، ساتواں بنگلادیش، آٹھواں نیوزی لینڈ اور نواں میچ انگلینڈ سے ہوگا۔

ایونٹ میں 10 ٹیمیں حصہ لیں گی اور ہر ٹیم گروپ مرحلے میں ایک دوسرے کے ساتھ ایک میچ لازمی کھیلے گی۔ ویسٹ انڈیز کی ٹیم کرکٹ کی تاریخ میں پہلی بار ورلڈکپ کے لئے کوالیفائی نہیں کرسکی ہے۔