نئے آسٹریلوی کوچ کیلیے امیدواروں کی لائن لگ گئی

سابق آسٹریلوی کوچ جسٹن لینگر کی جگہ 6 امیدوار میدان میں آگئے، لینگر کے مستعفی ہوجانے پر سی اے کی مشکل آسان ہوگئی۔

بورڈ حکام اب 6 امیدواروں سے موزوں فرد کا چناؤ کرپائیں گے، زیادہ امکان فوری طور پر عبوری ہیڈ کوچ مقرر کیے جانے کا ہے، آسٹریلوی ٹیم آئندہ ماہ پاکستان کا دورہ کرے گی.ممکنہ امیدواروں میں ٹریور بیلس، جیسن گلیسپی، رکی پونٹنگ، گریگ شیپرڈ، مائیکل ڈی وینوٹو اور اینڈریو مکڈونلڈ شامل ہیں۔ دوسری جانب لینگر نے اپنے استعفے میں شدید اور جذباتی الفاظ تحریر کرنے پر معذرت کرلی۔

سابق کوچ نے اپنے استعفے میں میں سپورٹ کی کمی کا شکوہ کرتے ہوئے اپنے دور میں حاصل کردہ کامیابیوں کو اپنا فخر بھی قرار دیا تھا، انھوں نے مستعفی ہونے کے معاملے پر ہیدا ہونے والی شدید صورتحال پر معذرت بھی کی۔

انھوں نے امید بھی ظاہر کی کہ جن حالات میں انھوں نے ٹیم سنبھالی تھی وہ اس سے بہتر پوزیشن میں اسے چھوڑ کر جارہے ہیں۔ان کا یہ خط اتوار کو مقامی میڈیامیں شائع بھی ہوا ہے، انھیں 6 ماہ کا محدود معاہدہ آفر کیا گیا تھا جسے قبول کرنے سے انھوں نے انکار کردیا تھا۔

اپنے کوچنگ انداز کے سبب میڈیا میں ہونے والی پیشگوئیوں سے متعلق انھوں نے تسلیم کیاکہ ٹیم ایسا کوچ چاہتی تھی جس کی سمت مختلف ہو، میں نے ہمیشہ دیانتداری کے ساتھ اپنا کام کیا، خوشی اس بات کی ہے کہ ٹیم کو ایک اچھی پوزیشن پر چھوڑ کر جارہا ہوں، مختصر مدت کی پیشکش اس لیے قبول نہیں کی تاکہ بورڈ فوری طور پر نئے کوچ کا تقرر کرے جوکہ آنے والے اہم معرکوں کیلیے ٹیم کو تیار کرے۔